Atebion a roddwyd i Aelodau ar 19 Chwefror 2009

[R] yn nodi bod yr Aelod wedi datgan buddiant.
[W] yn nodi bod y cwestiwn wedi’i gyflwyno yn Gymraeg.

Cynnwys

Cwestiynau i’r Prif Weinidog

Cwestiynau i’r Gweinidog dros Blant, Addysg, Dysgu Gydol Oes a Sgiliau

Cwestiynau i’r Gweinidog dros Gyllid a Chyflenwi Gwasanaethau Cyhoeddus

Cwestiynau i’r Prif Weinidog

Darren Millar (Gorllewin Clwyd): Fesul adrannau Llywodraeth Cynulliad Cymru ac ar gyfer pob blwyddyn er 1999, faint o weithwyr a gafodd eu diswyddo a beth oedd y rhesymau dros eu diswyddo? (WAQ53387)

Y Prif Weinidog (Rhodri Morgan): Ers 2003 bu 43 o ddiswyddiadau, 18 ohonynt yn faterion disgyblu a 23 ar sail effeithlonrwydd. Mae’r wybodaeth hon yn ein cronfeydd data Adnoddau Dynol, ond ni chafodd ei chofnodi’n ganolog cyn 2003. Mae’r dadansoddiad isod.

Cwestiynau i’r Gweinidog dros Blant, Addysg, Dysgu Gydol Oes a Sgiliau

Andrew R.T. Davies (Canol De Cymru): Faint o ymgeiswyr am Lwfansau Cynhaliaeth Addysg sydd wedi tynnu eu ceisiadau yn ôl eleni ac ym mhob blwyddyn ers eu cyflwyno? (WAQ53421)

Y Gweinidog dros Blant, Addysg, Dysgu Gydol Oes a Sgiliau (Jane Hutt): Ers iddo gael ei gyflwyno, ni thynnwyd unrhyw gais am Lwfans Cynhaliaeth Addysg yn ôl.

Andrew R.T. Davies (Canol De Cymru): Faint o fyfyrwyr a ymgeisiodd am Lwfans Cynhaliaeth Addysg y llynedd a pha gyfran sydd yn dal i ddisgwyl i’w ceisiadau gael eu cymeradwyo? (WAQ53422)

Jane Hutt: Gwnaeth 33,290 o fyfyrwyr gais am Lwfans Cynhaliaeth Addysg yn 2007/08 ac, o’r ceisiadau hyn, yn amodol ar gael y wybodaeth neu’r dystiolaeth sy’n weddill gan yr ymgeisydd, mae 1180 (3.5%) heb eu penderfynu o hyd. Nid oes unrhyw geisiadau o 2007/08 heb eu penderfynu lle y darparwyd yr holl wybodaeth. Cyhoeddwyd yr ystadegau diweddaraf ar geisiadau am Lwfans Cynhaliaeth Addysg ar gyfer 2008/09 yn y Datganiad Ystadegol Cyntaf 'Lwfansau Cynhaliaeth Addysg a Ddyfarnwyd yng Nghymru yn 2008/09 (Dros Dro)’ ym mis Ionawr 2009.

Andrew R.T. Davies (Canol De Cymru): Ar gyfartaledd, pa mor hir a gymerwyd i brosesu ceisiadau Lwfans Cynhaliaeth Addysg eleni ac mewn blynyddoedd blaenorol? (WAQ53425)

Jane Hutt: Gwerthuswyd nifer y diwrnodau a gymerir i brosesu’r ceisiadau gan ddefnyddio’r dyddiad y derbyniwyd y cais gyntaf, hyd nes y cyrhaeddir y cam asesu, gan ychwanegu 3 diwrnod er mwyn ystyried yr amser a gymerir i gyrraedd y Cwmni Benthyciadau i Fyfyrwyr. Mae penwythnosau a gwyliau banc yn yr Alban wedi’u cynnwys, a byddant yn cynyddu’r cyfartaledd.

Cyflwynwyd mesurau gwrth-twyll ychwanegol yn 2008/09 ac rwyf wedi bod yn monitro effeithiau’r amser prosesu hwy yn agos. O ganlyniad, cyhoeddais y gwelliannau y bydd y Cwmni Benthyciadau i Fyfyrwyr yn eu cyflwyno yn 2009/10 i wella amseroedd prosesu yn fy Natganiad Ysgrifenedig dyddiedig 16 Chwefror 2009.

Cwestiynau i’r Gweinidog dros Gyllid a Chyflenwi Gwasanaethau Cyhoeddus

Alun Cairns (Gorllewin De Cymru): Yn dilyn WAQ53150, a wnaiff y Gweinidog ddarparu rhestr o ddyddlyfrau a phapurau newydd y mae unigolion wedi’u prynu o gyllidebau Is-adrannol? (WAQ53428)

Y Gweinidog dros Gyllid a Chyflenwi Gwasanaethau Cyhoeddus (Andrew Davies): Ni chedwir gwybodaeth am gyfnodolion a phapurau newydd penodol a brynir gan unigolion o gyllidebau Is-adrannau yn ganolog.

Kirsty Williams (Brycheiniog a Sir Faesyfed): Pa gynlluniau sydd gan Lywodraeth Cynulliad Cymru i weithredu argymhellion y Pwyllgor Cyllid fel y’u gosodwyd allan yn adroddiad y Pwyllgor ar y gyllideb ddrafft? (WAQ53430)

Andrew Davies: Gellir gweld fy ymateb i argymhellion y Pwyllgor Cyllid ar y gyllideb ddrafft ar wefan Cynulliad Cenedlaethol Cymru yn:

http://www.cynulliadcymru.org/bus-home/bus-committees/bus-committees-third1/bus-committees-third-fin-home/bus-committees-third-fin-agendas.htm.

Yn benodol, rhannaf nod y Pwyllgor o sicrhau gwell tryloywder o fewn y broses graffu, a byddaf yn archwilio ffyrdd o gynyddu tryloywder ymhellach ar gyfer y broses o graffu ar y gyllideb ddrafft nesaf gan adeiladu ar y gwelliannau a wnaed eleni.