Croeso i dudalen adroddiad canfyddiadau’r gwaith ymgysylltu ar gyfer y Bil Iaith Arwyddion Prydain (BSL) (Cymru).
Mae isdeitlau ar y fideos Iaith Arwyddion Prydain. Gallwch hefyd agor y fersiwn Gymraeg neu’r fersiwn Saesneg a darllen yr adroddiad ochr yn ochr â'r fideos Iaith Arwyddion Prydain.
Mae penawdau'r penodau a rhifau'r paragraffau yn cyfateb, ac felly mae'n hawdd dilyn y testun a'r fideo ar yr un pryd.
Gobeithiwn y bydd y fformat hwn yn eich helpu i gael mynediad at y canfyddiadau a'u deall. Diolch am roi o’ch amser i archwilio’r adroddiad.
Mae'r bennod hon yn cynnig trosolwg o amcanion, methodoleg a dyluniad y gwaith ymgysylltu, gan amlinellu'r dull a ddefnyddiwyd i gasglu mewnwelediadau gan arwyddwyr Iaith Arwyddion Prydain a'u teuluoedd.
Caiff BSL ei gweld fel iaith "hardd" sy'n ganolog i hunaniaeth y cyfranogwyr. Mae modelau rôl fel Rose Ayling-Ellis wedi meithrin balchder, ond prin yw’r gydnabyddiaeth gymdeithasol a pharch at BSL o hyd.
Rhwystrau gofal iechyd
Mae pobl fyddar yn wynebu rhwystrau cyfathrebu helaeth, o systemau apwyntiadau dros y ffôn i ddiffyg staff gofal iechyd â hyfforddiant BSL. Soniodd y cyfranogwyr am staff derbynfa annigonol, systemau gwael ar gyfer trefnu dehonglwyr, a gofal anniogel oherwydd cam-gyfathrebu. Roedd y datrysiadau posibl yn cynnwys systemau apwyntiad gweledol a chronfeydd data GIG yn gwneud nodyn o anghenion cleifion byddar.
Heriau addysg
Mae mynediad cynnar cyfyngedig i BSL yn effeithio ar ddatblygiad iaith plant byddar. Mae teuluoedd yn wynebu rhwystrau ariannol a systemig i ddysgu BSL, ac mae’r cymorth mewn ysgolion prif ffrwd yn anghyson. Galwodd y cyfranogwyr i BSL fod yn rhan o’r cwricwlwm ac i ysgolion byddar penodedig yng Nghymru leihau’r ymdeimlad o ynysu a meithrin hunaniaeth.
Gwasanaethau cyhoeddus a hygyrchedd
Mae darpariaeth BSL anghyson ar draws awdurdodau lleol yn creu loteri cod post. Mae trafnidiaeth gyhoeddus a gofal preswyl yn aml yn methu â bodloni anghenion arwyddwyr BSL.
Cyflogaeth a hyfforddiant
Mae hyfforddiant anhygyrch a chymorth annigonol gan y ganolfan waith yn golygu bod diweithdra’n parhau, gan gyfrannu at ynysu cymdeithasol a phroblemau iechyd meddwl.
Prinder dehonglwyr a systemau archebu
Mae prinder dehonglwyr BSL a systemau archebu gwael yn cyfyngu ar fynediad i wasanaethau hanfodol. Galwodd y cyfranogwyr am un system archebu ar gyfer Cymru gyfan wedi’i chreu ar y cyd â phobl fyddar.
Cydnabod a hyrwyddo BSL
Galwodd y cyfranogwyr i BSL gael yr un gydnabyddiaeth a chefnogaeth gyfreithiol â’r Gymraeg, gan bwysleisio ei rôl fel iaith angenrheidiol. Galwyd am gyrsiau BSL cymunedol hygyrch.
Cynrychiolaeth ac arweinyddiaeth
Cytunodd y cyfranogwyr y dylai'r Comisiynydd BSL fod yn arwyddwr BSL byddar. Pwysleisiwyd pwysigrwydd ymgysylltu ystyrlon â’r gymuned fyddar wrth bennu rôl y Comisiynydd. Galwodd hefyd am bwerau gorfodi i’r Comisiynydd i sicrhau bod cyrff cyhoeddus yn bodloni eu rhwymedigaethau.
Mae'r bennod hon yn cyflwyno'r 24 o atebion a gynigiwyd gan gyfranogwyr yn ystod y trafodaethau.
Maent yn adlewyrchu gobeithion y cyfranogwyr am y newidiadau posibl y gallai Deddf Iaith Arwyddion Prydain eu cyflwyno, a'r potensial ar gyfer polisïau hirdymor i gryfhau hawliau, cydnabyddiaeth a chynhwysiant arwyddwyr Iaith Arwyddion Prydain yng Nghymru.
Iaith Arwyddion Prydain: Iaith, Hunaniaeth a Diwylliant
Mae'r bennod hon yn tynnu sylw at bwysigrwydd Iaith Arwyddion Prydain fel iaith ganolog i hunaniaeth a diwylliant y gymuned Fyddar, gan drafod rhwystrau i gydnabyddiaeth a pharch hefyd
Iechyd
Mae'r bennod hon yn trafod y rhwystrau cyfathrebu y mae unigolion byddar yn eu hwynebu mewn gofal iechyd, gan gynnwys problemau gydag apwyntiadau, mynediad at ddehonglydd, a gofal anniogel.
Addysg
Mae'r bennod hon yn canolbwyntio ar y blynyddoedd cynnar a chefnogaeth i deuluoedd, parhad cyfathrebu ar draws yr ysgol, y cartref a'r gymuned, pryderon o ran addysg brif ffrwd Iaith Arwyddion Prydain, a galwad am ysgol arbenigol i blant byddar yng Nghymru.
Gwasanaethau cyhoeddus
Mae'r bennod hon yn trafod yr heriau y mae pobl fyddar yn eu hwynebu wrth gael mynediad at wasanaethau awdurdodau lleol, trafnidiaeth gyhoeddus a gofal i'r henoed, yn enwedig oherwydd diffyg darpariaeth Iaith Arwyddion Prydain.
Hyfforddiant a chyflogaeth
Mae'r bennod hon yn trafod y rhwystrau i gael mynediad at addysg a hyfforddiant galwedigaethol i unigolion byddar, gan gynnwys diffyg cefnogaeth Iaith Arwyddion Prydain a'r effaith ar gyfleoedd cyflogaeth.
Argaeledd a hygyrchedd dehonglwyr BSL
Mae'r bennod hon yn mynd i'r afael â'r prinder dybryd o ddehonglwyr Iaith Arwyddion Prydain cymwys yng Nghymru, yr heriau gyda systemau trefnu dehonglwyr, a'r diffyg ymgynghori â'r gymuned Fyddar wrth ddylunio gwasanaethau.
Cydnabyddiaeth a hyrwyddo BSL
Mae'r bennod hon yn canolbwyntio ar y rhwystrau i ddysgu a chael mynediad at Iaith Arwyddion Prydain, y cydraddoldeb rhwng Iaith Arwyddion Prydain, y Gymraeg a'r Saesneg, a'r galw i gydnabod Iaith Arwyddion Prydain yn gyfreithiol.
Comisiynydd BSL
Mae'r bennod hon yn nodi barn cyfranogwyr ar y rôl a'r pwerau sydd eu hangen ar Gomisiynydd Iaith Arwyddion Prydain, gan bwysleisio pwysigrwydd profiad byw a chynrychiolaeth yn y rôl hefyd.
