Prif
ddiddordebau a chyflawniadau
Mae David
yn eiriolwr cryf dros gydberthnasau da rhwng gweithwyr a'u cyflogwyr, felly
mae'n credu bod gan undebau llafur rôl bwysig i’w chwarae o ran cefnogi pobl
sy'n gweithio. Mae'n aelod o’r undebau llafur Unite ac Unsain, a bu hefyd yn
aelod o Undeb y Prifysgolion a'r Colegau yn ystod ei yrfa addysgol. Yn sgil ei
ddiddordeb academaidd ym maes cyfrifiaduron, daeth yn aelod o Gymdeithas
Cyfrifiaduron Prydain ac yn Beiriannydd Siartredig yn ystod ei gyfnod fel
academydd.
Mae ei
ddiddordebau gwleidyddol yn cynnwys dyfodol gweithgynhyrchu yng Nghymru,
darparu gwasanaethau iechyd, addysg, datblygu economaidd ac adfywio, gan
gynnwys creu rhagor o gyfleoedd twristiaeth yng nghymoedd De Cymru a gwella
gwasanaethau cyhoeddus mewn cymunedau lleol.
Hanes
personol
Mae David
Rees yn frodor o Aberafan a chafodd ei addysg yn yr ysgolion cynradd ac
uwchradd lleol. Ar ôl gorffen ei astudiaethau Safon Uwch aeth i Goleg Prifysgol
Caerdydd (Prifysgol Caerdydd erbyn hyn) ar gyfer ei astudiaethau israddedig a'i
TAR. Ym Mhort Talbot y bu ei gartref erioed, ac erbyn hyn mae'n byw gyda'i
wraig yng Nghwmafan, Port Talbot. Mae ganddynt ddwy ferch, a gafodd eu haddysg
yn yr ysgolion cyfrwng Cymraeg lleol, a phump o wyrion.
Mae gan
David radd anrhydedd mewn Peirianneg Sifil a Strwythurol o Brifysgol Caerdydd,
yn ogystal â chymhwyster addysgu ôl-raddedig a gradd meistr mewn Cyfrifiadureg.
Cefndir
proffesiynol
Ar
ddechrau ei yrfa, bu David yn athro mathemateg a chyfrifiadureg yn Ysgol Gyfun
Cynffig, Mynydd Cynffig, ac yna bu'n ddarlithydd mewn cyfrifiadureg yng Ngholeg
Afan. Yna, aeth i faes addysg uwch fel uwch-ddarlithydd mewn Cyfrifiadureg, a
chyn iddo gael ei ethol i'r Cynulliad Cenedlaethol yn 2011, datblygodd ei yrfa
er mwyn dod yn Ddeon Cynorthwyol y Gyfadran ym Mhrifysgol Fetropolitan Abertawe
(sydd bellach yn rhan o Brifysgol Cymru y Drindod Dewi Sant). Yn ystod ei gyfnod
ym Mhrifysgol Fetropolitan Abertawe, bu David yn gadeirydd cydbwyllgor yr undeb
llafur ac yn aelod lleyg o bwyllgor rhanbarthol Cymru o UCU (NATFHE) gan
gynrychioli aelodau o bob rhan o'r sefydliad.
Mae David
wedi dangos diddordeb parhaus mewn llywodraethu addysgol ac wedi bod yn
llywodraethwr staff yn Athrofa Addysg Uwch Abertawe (fel y'i gelwid bryd hynny)
a Choleg Afan (fel y'i gelwid bryd hynny), ynghyd â rhiant-lywodraethwr yn
Ysgol Gyfun Ystalyfera.
Hanes
gwleidyddol
Yn 2011 y
cafodd David ei ethol gyntaf i Gynulliad Cenedlaethol Cymru gan olynu Dr Brian
Gibbons fel yr Aelod Cynulliad Llafur dros Aberafan. Yn ystod pedwerydd tymor y
Cynulliad bu David yn cadeirio'r Pwyllgor Iechyd a Gofal Cymdeithasol, a bu
hefyd yn gwasanaethu ar y Pwyllgor Menter a Busnes, Pwyllgor yr Amgylchedd a'r
Pwyllgor Plant, Pobl Ifanc ac Addysg. Bu hefyd yn gadeirydd grwpiau
trawsbleidiol ar Wyddoniaeth a Thechnoleg, Iechyd Meddwl a Chymunedau
Diwydiannol.
Yn 2016,
ail-etholwyd David i gynrychioli Aberafan yn y Senedd. Yn ystod y Bumed Senedd, bu David yn
cadeirio’r Pwyllgor Materion Allanol a Deddfwriaeth Ychwanegol, a bu hefyd yn
aelod o'r Pwyllgor Cyllid, y Pwyllgor Iechyd, Gofal Cymdeithasol a Chwaraeon,
a'r Pwyllgor Craffu ar Waith y Prif Weinidog.
Parhaodd i gadeirio’r grwpiau trawsbleidiol ar STEMM ac Iechyd Meddwl, a
bu hefyd yn cadeirio grwpiau trawsbleidiol ar Ddur, Nyrsio a Bydwreigiaeth a
Chanser, tra’r oedd yn aelod o sawl grŵp arall.
Yn 2021,
cafodd David ei ailethol unwaith eto i gynrychioli ei dref enedigol yn y
Chweched Senedd, ac fe'i etholwyd yn Ddirprwy Lywydd yn dilyn hynny.
Ers ymuno
â'r Blaid Lafur ym 1982, mae wedi dal nifer o swyddi o fewn y blaid yng
Nghymru, yn ogystal â'i undebau llafur.
Cyn cael
ei ddewis i gynrychioli etholaeth ei gartref yn 2011, bu David yn ymgeisydd y
Blaid Lafur yn sir Frycheiniog a Maesyfed yn etholiad y Cynulliad Cenedlaethol
yn 2003, ac yn ymgeisydd ar restr Gorllewin De Cymru yn etholiad 2007.
