Prif ddiddordebau a chyflawniadau
Mae Paul yn gefnogwr brwd o ymdrechion i
ddiogelu gwasanaethau mewn ysbytai lleol, ac mae wrthi’n gweithio gyda grwpiau
ymgyrchu i warchod gwasanaethau yn Ysbyty Llwynhelyg ac Ysbyty Bronglais yng
ngorllewin Cymru. Mae Paul hefyd yn ymgyrchydd cyson dros y gymuned awtistiaeth
yng Nghymru, a chyflwynodd ddeddfwriaeth ddrafft ar Ddeddf Awtistiaeth i Gymru,
a arweiniodd at newidiadau statudol sylweddol mewn darpariaeth awtistiaeth yng
Nghymru, er na chafodd y ddeddfwriaeth ei hun ei phasio gan y Senedd.
Hanes personol
Ganed Paul ym 1969 a thyfodd i fyny ym
Mhont-siân y tu allan i Landysul yn sir Ceredigion. Mynychodd Ysgol Gynradd
Tregroes, Ysgol Ramadeg Llandysul ac ar ôl astudio ei Lefel A yn Ysgol Gyfun
Castellnewydd Emlyn, ymunodd â Banc Lloyds ym 1987.
Cefndir proffesiynol
Cyn cael ei ethol, parhaodd Paul i gael ei
gyflogi gan Fanc Lloyds a'i rôl olaf gyda'r cwmni oedd fel Rheolwr Busnes yn
Hwlffordd yn helpu i gefnogi busnesau bach.
Hanes gwleidyddol
Ym mis Chwefror 2000, ymladdodd Paul isetholiad Seneddol Ceredigion a
gwella sefyllfa Plaid y Ceidwadwyr Cymreig gan ddod yn drydydd y tro hwn ar ôl
iddi ddod yn bumed yn yr etholiad blaenorol. Safodd hefyd yn etholiad
cyffredinol 2001 fel yr ymgeisydd Seneddol dros Geredigion. Yn 2003, safodd
Paul dros y Ceidwadwyr Cymreig ym Mhreseli Sir Benfro yn etholiad y Cynulliad a
chynyddu cyfran ei blaid o 23 y cant i 30 y cant. Ym mis Mai 2007, etholwyd
Paul yn Aelod Cynulliad y Ceidwadwyr Cymreig dros Breseli Sir Benfro, gyda 38.6
y cant o'r bleidlais a mwyafrif o 3,205. Yn etholiad y Cynulliad yn 2011,
ail-etholwyd Paul a chynyddodd ei gyfran o'r bleidlais i 42.4 y cant. Yn 2016,
ail-etholwyd Paul, gan gynyddu ei fwyafrif i 3,930. Parhaodd i wasanaethu fel
Dirprwy Arweinydd Grŵp
y Ceidwadwyr Cymreig, ac fel y Rheolwr Busnes a’r Phrif Chwip. Ym mis Medi 2018, cafodd ei
ethol yn Arweinydd y Ceidwadwyr Cymreig yn y Senedd, gan ddal y swydd tan 2021.
Yn etholiad y Senedd yn 2021, cafodd Paul ei ail-ethol gyda mwyafrif o 1,400, a
chafodd ei ail-ethol eto yn 2026 yn etholaeth newydd Ceredigion Penfro.
