Etholwyd Huw i'r
Senedd ym mis Mai 2026 fel aelod Llafur Cymru dros Gaerdydd Penarth. Yn dilyn
hynny, cafodd ei wneud yn llefarydd Llafur dros Gyllid, Democratiaeth,
Dinasyddiaeth a'r Gymraeg.
Ganwyd a magwyd
Huw yn Aberystwyth i deulu Cymraeg ei iaith, lle y meithrinwyd ymrwymiad cryf i
wasanaeth cyhoeddus o oedran cynnar, gan ei rieni a oedd yn athrawon. Mae
ganddo radd mewn Cerddoriaeth o Brifysgol Rhydychen a gradd Meistr mewn
Cysylltiadau Rhyngwladol o Brifysgol Aberystwyth.
Cyn symud i faes
gwleidyddiaeth amser llawn, adeiladodd Huw yrfa ym maes rheoli prosiectau, gan
weithio yn y sectorau awyrofod a thrafnidiaeth gynaliadwy. Yn ddiweddarach
gwasanaethodd fel Pennaeth Cymorth Cristnogol Cymru, gan arwain gwaith y
sefydliad ledled y wlad.
Etholwyd Huw yn
Gynghorydd dros Sblot yng Nghaerdydd yn 2012 a gwasanaethodd fel Arweinydd
Cyngor Caerdydd rhwng 2017 a 2026. O dan ei arweinyddiaeth, cododd Cyngor
Caerdydd fwy na 1,500 o dai cyngor newydd, ehangwyd y rhaglen fwyaf ers
cenedlaethau o adeiladu ysgolion, amddiffynnwyd gyllid addysg a gwasanaethau
cymdeithasol, a helpwyd i sefydlu Caerdydd fel dinas flaenllaw o ran y Cyflog
Byw Go Iawn. Gweithredodd ei weinyddiaeth raglenni datblygu economaidd
uchelgeisiol gan gynnwys cwblhau'r Sgwâr Canolog, dechrau’r gwaith ar Arena Dan
Do newydd â chapasiti o 16,500, a chreu a dylunio rhwydwaith Cledrau Croesi
Caerdydd. Yn ystod ei gyfnod yn y Cyngor cymerwyd camau sylweddol hefyd i fynd
i'r afael â newid hinsawdd, a chyhoeddwyd Argyfwng Hinsawdd yn 2019, adeiladwyd
fferm solar newydd yn Lamby Way, gosodwyd rhwydwaith gwresogi ardal cyntaf y
ddinas, gwnaed welliannau parhaus mewn cyfraddau ailgylchu, a phlannwyd dros
150,000 o goed ledled y ddinas.
Fel Arweinydd y
Cyngor, bu Huw yn arwain yr awdurdod drwy heriau sylweddol, gan gynnwys
pandemig COVID-19, yr argyfwng costau byw a phwysau parhaus ar gyllid
llywodraeth leol. Gweithiodd yn agos gyda gweinidogion Llywodraeth Cymru,
undebau llafur a phartneriaid cymunedol i ddarparu gwasanaethau a chefnogi
trigolion ledled y brifddinas.
Mae Huw yn byw yn
yr etholaeth gyda'i wraig a'u dau o blant. Mae'n angerddol dros fynd i'r afael
ag anghydraddoldeb, cryfhau gwasanaethau cyhoeddus a sicrhau bod gan bawb,
waeth beth fo'u cefndir neu eu hamgylchiadau, y cyfle i ffynnu.
