Prif
ddiddordebau a chyflawniadau
Mae Sera yn
angerddol am bob mater sy'n gysylltiedig ag addysg, ac mae ganddi brofiad
sylweddol o lywio deddfwriaeth a gwasanaethau ym maes anghenion dysgu
ychwanegol – proses sydd wedi’i hategu gan ei phrofiad byw ei hun. Mae Sera
wedi bod yn eiriolwr cryf dros drigolion lleol, gan sicrhau bod modd iddynt
gael mynediad at y cymorth sydd ei angen arnynt ar draws ystod o feysydd a
gwasanaethau. Yn ei rôl fel Cynghorydd, mae Sera wedi cefnogi trigolion gyda
nifer o faterion lleol, gan gynnwys adfer gwasanaethau bysiau lleol, mynd i’r
afael ag achosion o lifogydd, a gwella mynediad at wasanaethau, gan sicrhau
tegwch i bawb. Mae hi'n eiriolwr brwd dros addysg cyfrwng Cymraeg, addysg
anghenion dysgu ychwanegol, ac ehangu cyfranogiad mewn addysg uwch, a oedd yn rhan
greiddiol o'i rôl ym Mhrifysgol De Cymru (gweler isod). Mae Sera hefyd wedi
ymgyrchu o blaid gwella cludiant i’r ysgol, cefnogi cydraddoldeb iechyd, a mynd
i'r afael â thlodi plant.
Hanes personol
Cafodd Sera ei
geni a’i magu yng Nghwmparc, ac mae hi bellach yn byw yn Nhreorci gyda'i dau
fab. Cafodd ei haddysgu yn Ysgol Gynradd Gymraeg Ynyswen, Ysgol Gyfun Cwm
Rhondda (Ysgol Gyfun Cymer Rhondda gynt) a Phrifysgol Rhydychen, lle enillodd
radd anrhydedd ail ddosbarth uwch (2.1) ac yna radd meistr mewn ieithoedd
modern ac ieithyddiaeth. Mae gan Sera dystysgrif addysg i raddedigion (TAR) a
chymwysterau proffesiynol ym meysydd diogelu, iechyd a diogelwch ac
arweinyddiaeth a rheoli. Mae Sera yn gyfathrebwr rhagorol, ac mae ganddi hanes
cryf o gynrychioli cymunedau'r Cymoedd mewn modd tosturiol, difyr a dygn.
Cefndir
proffesiynol
Tan iddi gael ei
hethol i'r Senedd ym mis Mai 2026, bu Sera’n gweithio ym Mhrifysgol De Cymru
fel Cyfarwyddwr Cyswllt Recriwtio a Derbyniadau Myfyrwyr y DU. Mae Sera yn
gyn-athrawes, a chafodd ei hyfforddi ym Mhrifysgol Metropolitan Caerdydd (UWIC
gynt). Gweithiodd yn Ysgol Gyfun Bro Morgannwg yn y Barri cyn dechrau ym
Mhrifysgol De Cymru yn 2007, fel Swyddog Cyswllt Ysgolion a Cholegau. Cafodd ei
dyrchafu i rôl Rheolwr Recriwtio’r DU, ac yna i rôl Pennaeth Recriwtio Myfyrwyr
y DU, cyn cael ei phenodi’n Gyfarwyddwr Cyswllt yn 2022. Mae Sera yn
gwasanaethu fel Is-gadeirydd y llywodraethwyr yn Ysgol Gynradd Parc ac fel
llywodraethwr yn Ysgol Gyfun Cwm Rhondda, ac mae ganddi brofiad helaeth o
drawsnewid a datblygu cyrff llywodraethu.
Hanes
gwleidyddol
Cafodd Sera ei
hethol fel Cynghorydd yng Nghyngor Bwrdeistref Sirol Rhondda Cynon Taf yn 2008,
yn cynrychioli ward Cwmparc, Treorci ac Ynyswen. Daliodd y sedd honno hyd nes
iddi gael ei hethol i’r Senedd ym mis Mai 2026. Rhwng 2022 a 2026, Sera oedd
Dirprwy Arweinydd yr Wrthblaid a Chadeirydd y Pwyllgor Craffu ar Addysg a
Chynhwysiant yn y cyngor. Roedd hi hefyd yn aelod o'r Pwyllgor Trosolwg a
Chraffu a Phanel Penodi Llywodraethwyr yr awdurdod lleol. Chwaraeodd Sera ran
allweddol yn y broses o sefydlu gweithgor ar dlodi plant o fewn RCT, a hynny yn
sgil cynnig a gyflwynwyd ganddi i'r cyngor mewn perthynas â lliniaru tlodi
plant yn y fwrdeistref sirol. Ar ben hynny, cadeiriodd Sera weithgor ar
gymunedau dysgu cynaliadwy, gan archwilio effaith y buddsoddiad a wnaed yn RCT
ar gyfer y rhaglen ysgolion ar gyfer yr 21ain ganrif.
