Mae Pwyllgor Amgylchedd a Chynaliadwyedd y Cynulliad Cenedlaethol yn gofyn a oes angen deddfu i ddatblygu Cymru well.
Mae 'Bil Llesiant Cenedlaethau’r Dyfodol (Cymru)
' Llywodraeth Cymru, sydd wedi cael llawer o gyhoeddusrwydd, yn nodi cyfres o nodau ar gyfer datblygu cymdeithas fwy llewyrchus, cadarn, iach a chyfartal.
Yn ymarferol, nod Llywodraeth Cymru yw cyflawni hynny drwy greu byrddau gwasanaethau cyhoeddus statudol a fyddai'n cyfuno cynrychiolwyr o gynghorau lleol, byrddau iechyd, awdurdodau tân a Cyfoeth Naturiol Cymru; oll yn unedig yn y nod cyffredin o wella canlyniadau i bobl leol.
Mae cynnig hefyd yn y Bil i greu 'Comisiynydd Cenedlaethau'r Dyfodol'. Byddai hon yn rôl ymgynghorol â chyfrifoldeb am arwain cyrff cyhoeddus i ddod o hyd i'r ateb mwyaf hyfyw ar gyfer eu cymuned ac i weithio i ymgorffori egwyddorion datblygu cynaliadwy i mewn i fywyd cyhoeddus.
Cam cyntaf y broses ddeddfu yn y Cynulliad yw gofyn i bwyllgor ystyried a yw Bil yn angenrheidiol, neu a ellir cyflawni ei amcanion drwy gyfreithiau presennol. Bydd hefyd yn ystyried a fydd y Bil yn cyflawni'r amcanion a nodir.
Dywedodd Alun Ffred Jones AC, Cadeirydd y Pwyllgor Amgylchedd a Chynaliadwyedd: “Mae hon yn weledigaeth fawreddog gan Lywodraeth Cymru. Mae pawb am weld cymdeithas fwy llewyrchus, iach, cynaliadwy a chynhwysfawr yng Nghymru.
“Bydd y Pwyllgor yn trafod a oes angen cyfraith newydd ar gyfer y weledigaeth hon, ac a fydd y mesurau y mae'r Llywodraeth wedi'u hamlinellu yn cyflawni'r weledigaeth honno.
“Fel y mae'r enw'n awgrymu, mae gan y Bil hwn y potensial i effeithio ar bawb yng Nghymru am genedlaethau i ddod, felly mae'n hanfodol ein bod yn casglu cymaint o safbwyntiau â phosibl er mwyn sicrhau, os daw yn gyfraith, y bydd wir yn helpu i ddatblygu Cymru well.”
Bydd y Pwyllgor yn trafod prif feysydd y Bil, sef:
Sut y dylai Llywodraeth Cymru ddeddfu er mwyn gosod datblygu cynaliadwy fel egwyddor graidd yng ngwaith y Llywodraeth.
Eglurhad cyffredinol ynghylch beth yw ystyr yr egwyddor "nod cyffredin" a "datblygu cynaliadwy", a phwy gaiff eu cynnwys yn y rhestr o Gyrff Cyhoeddus.
Sut y caiff unrhyw gynnydd ei fesur a sut yr adroddir ar hynny.
Rhagolwg o ran goblygiadau ariannol y Bil.
Os hoffech gyflwyno eich barn ar y Bil Llesiant Cenedlaethau’r Dyfodol (Cymru), anfonwch e-bost at: PwyllgorAC@cymru.gov.uk, neu ysgrifennwch at:
Clerc y Pwyllgor Amgylchedd a Chynaliadwyedd
Cynulliad Cenedlaethol Cymru
Bae Caerdydd
Caerdydd
CF99 1NA
Fel arall, dilynwch y Pwyllgor ar Twitter: @AmgylchSenedd
Mae rhagor o wybodaeth am y Pwyllgor Amgylchedd a Chynaliadwyedd ar gael yma.
Gellir gweld rhagor o wybodaeth am y Bil Llesiant Cenedlaethau’r Dyfodol (Cymru) yma.