Mae Pwyllgor Amgylchedd a Chynaliadwyedd Cynulliad Cenedlaethol Cymru yn gofyn am farn y cyhoedd ynghylch Bil yr Amgylchedd (Cymru).
Mae'r Bil, a gyflwynwyd gan Lywodraeth Cymru ar 11 Mai, yn ceisio deddfu ar amrywiaeth eang o faterion sy'n ymwneud â'r amgylchedd, gan gynnwys:
- Cynllunio a rheoli cyfoeth naturiol Cymru ar lefel genedlaethol a lleol.
- Darparu pwrpas cyffredinol i Gyfoeth Naturiol Cymru sy'n gysylltiedig ag 'egwyddorion statudol rheoli adnoddau naturiol yn gynaliadwy' fel y diffinnir yn y Bil.
- Gwella'r pwerau sydd ar gael i Gyfoeth Naturiol Cymru ymgymryd â chytundebau rheoli tir a chynlluniau arbrofol.
- Darparu gofyniad i awdurdodau cyhoeddus gynnal a gwella bioamrywiaeth.
- Creu fframwaith statudol ar gyfer gweithredu o ran newid yn yr hinsawdd, gan gynnwys targedau ar gyfer lleihau allyriadau nwyon tŷ gwydr.
- Diwygio'r gyfraith ar godi tâl am fagiau plastig
- Darparu pwerau i Weinidogion Cymru mewn perthynas ag ailgylchu gwastraff (gan gynnwys casglu gwastraff ar wahân); trin gwastraff bwyd ac adfer ynni mewn busnes.
- Gwneud darpariaeth o ran gorchmynion niferus a rheoleiddiedig ar bysgodfeydd ar gyfer pysgod cregyn.
- Ffioedd am drwyddedau morol.
- Sefydlu Pwyllgor Llifogydd ac Erydu Arfordirol
- Newidiadau i'r gyfraith ar ddraenio tir ac is-ddeddfau a wnaed gan Gyfoeth Naturiol Cymru.
Dywedodd Alun Ffred Jones AC, Cadeirydd y Pwyllgor Amgylchedd a Chynaliadwyedd:
"Bydd y cynigion hyn, os cânt eu gwneud yn gyfraith, yn effeithio ar bob agwedd ar ein bywydau; o faterion mawr fel gosod ein huchelgeisiau ar gyfer mynd i'r afael â newid yn yr hinsawdd a sut mae'r tir o'n cwmpas yn cael ei reoli i fanylion fel faint yr ydym yn ei dalu am fag siopa a sut y byddwn yn didoli ein gwastraff ailgylchu.
"Mae'n bwysig bod y Bil hwn yn gywir, gan y bydd yn cael effaith sylfaenol ar sut rydym yn cadw cydbwysedd rhwng cadwraeth ac adfer natur wrth ddefnyddio ein cyfoeth naturiol mewn modd cynaliadwy.
"Fel Pwyllgor, byddwn yn edrych ar y Bil hwn yn fanwl i weld a ddylai ddod yn gyfraith, ac i sicrhau, os bydd hynny'n digwydd, bod y Bil yn cyrraedd y safonau uchaf posibl."