Atebion a roddwyd i Aelodau ar 3 Mehefin 2009

[R] yn nodi bod yr Aelod wedi datgan buddiant.
[W] yn nodi bod y cwestiwn wedi’i gyflwyno yn Gymraeg.

Cynnwys

Cwestiynau i’r Prif Weinidog

Cwestiynau i’r Dirprwy Brif Weinidog a’r Gweinidog dros yr Economi a Thrafnidiaeth

Cwestiynau i’r Gweinidog dros yr Amgylchedd, Cynaliadwyedd a Thai

Cwestiynau i’r Gweinidog dros Iechyd a Gwasanaethau Cymdeithasol

Cwestiynau i’r Prif Weinidog

Nick Bourne (Canolbarth a Gorllewin Cymru): A yw’r Gweinidog wedi cael unrhyw drafodaeth ynghylch hyfywedd Alwminiwm Môn? (WAQ54253)

Y Prif Weinidog (Rhodri Morgan): Cyn ac ers cyflwyno hysbysiadau ymgynghori, bûm mewn trafodaethau â sefydliadau amrywiol, ar y cyd â Llywodraeth y DU, o ran dyfodol Alwminiwm Môn.  

Cwestiynau i’r Dirprwy Brif Weinidog a’r Gweinidog dros yr Economi a Thrafnidiaeth

Kirsty Williams (Brycheiniog a Sir Faesyfed): A wnaiff y Gweinidog ddatganiad am ymestyn y Fenter Tocynnau Teithio Rhatach ar Drafnidiaeth Gymunedol a pha feini prawf newydd, os o gwbl, y bydd yn rhaid i ddefnyddwyr eu diwallu? (WAQ54226)

Y Dirprwy Brif Weinidog a’r Gweinidog dros yr Economi a Thrafnidiaeth (Ieuan Wyn Jones): Ym mis Mawrth 2009 cyhoeddais gynlluniau i ehangu'r Cynllun Teithio Rhatach ar Drafnidiaeth Gymunedol. Rwyf wedi penderfynu parhau gyda'r meini prawf presennol ar gyfer 2009-10. Bydd hon yn flwyddyn bontio ac yn caniatáu i ni weithio gyda Chymdeithas Cludiant Cymunedol Cymru i ddatblygu cynllun mwy cynaliadwy ar gyfer y cyhoedd.

Nick Bourne (Canolbarth a Gorllewin Cymru): A wnaiff y Gweinidog ddatganiad am ddyfodol y cysylltiad awyr rhwng Caerdydd ac Ynys Môn? (WAQ54252)

Y Dirprwy Weinidog: Mae'r contract Gwasanaeth Awyr Oddi Mewn i Gymru presennol yn rhedeg hyd at fis Mai 2010.  Mae fy swyddogion wrthi'n adolygu'r opsiynau ar gyfer y gwasanaeth awyr a bydd hyn yn llywio fy mhenderfyniad ar sut i symud ymlaen.   

Nick Bourne (Canolbarth a Gorllewin Cymru): Sawl swydd gweithgynhyrchu a gollwyd yng Nghymru ym mhob mis er mis Mai 2007? (WAQ54254)

Y Dirprwy Weinidog: Ni cheir amcangyfrifon misol swyddogol o swyddi yng Nghymru yn ôl sector. Dengys y gyfres swyddi cyflogeion swyddogol, a gyhoeddir yn chwarterol, yn y tabl isod. Mae'r data mwyaf diweddar yn ymwneud â'r cyfnod rhwng mis Mehefin 2007 a mis Rhagfyr 2008.  Dengys y data fod cyfanswm nifer y swyddi cyflogeion yng Nghymru dros y cyfnod hwn wedi lleihau o 1,185,600 i 1,145,400.  Mae cyfanswm nifer y swyddi cyflogeion yn y sector gweithgynhyrchu wedi lleihau o 160,800 i 151,700 dros yr un cyfnod

Swyddi cyflogeion yn ôl diwydiant, Cymru (miloedd)

Ffynhonnell: Arolygon Cyflogwyr, SYG.

Nick Bourne (Canolbarth a Gorllewin Cymru): Sawl swydd gwasanaeth cyhoeddus a gollwyd yng Nghymru ym mhob mis er mis Mai 2007? (WAQ54255)

Y Dirprwy Weinidog: Nid oes amcangyfrifon misol swyddogol o swyddi yng Nghymru yn ôl sector. Caiff yr unig ffynhonnell swyddogol o gyflogaeth yn y sector cyhoeddus ei chyhoeddi'n flynyddol. Dengys y data diweddaraf yn y tabl isod.

Cyflogaeth yn y Sector Cyhoeddus a'r Sector Preifat, Cymru

Ffynhonnell: Cyflogaeth yn y Sector Cyhoeddus Rhanbarthol, SYG.

Nick Bourne (Canolbarth a Gorllewin Cymru): A wnaiff y Gweinidog amlinellu sut a phryd y mae’n disgwyl i GYC Cymru gyrraedd 90 y cant o GYC y DU? (WAQ54256)

Y Dirprwy Weinidog: Nid oes unrhyw ragolygon swyddogol wedi'u gwneud ar gyfer GYC Cymru.

Cwestiynau i’r Gweinidog dros yr Amgylchedd, Cynaliadwyedd a Thai

Lorraine Barrett (De Caerdydd a Phenarth): Pa drafodaethau y mae’r Gweinidog wedi’u cael gyda’r Adran Cymunedau a Llywodraeth Leol a Swyddfa Cymru ynghylch yr ymgynghoriad i gasgliadau adolygiad Rugg i’r Sector Rhentu Preifat? (WAQ54296)

Y Gweinidog dros yr Amgylchedd, Cynaliadwyedd a Thai (Jane Davidson): Mae swyddogion Llywodraeth y Cynulliad yn gweithio'n agos gyda'r Adran Cymunedau a Llywodraeth Leol i ystyried sut y gall casgliadau adolygiad Rugg gynnig manteision i Gymru, yn enwedig lle ceir cyfle i ddefnyddio dull gweithredu ar y cyd.

Cwestiynau i’r Gweinidog dros Iechyd a Gwasanaethau Cymdeithasol

Andrew R.T. Davies (Canol De Cymru): Beth yw oed ymddeol cyfartalog bydwragedd ym mhob Ymddiriedolaeth GIG yng Nghymru? (WAQ54235)

Y Gweinidog dros Iechyd a Gwasanaethau Cymdeithasol (Edwina Hart): Ni ddelir y wybodaeth hon yn ganolog.