18/02/2008 - Atebion a roddwyd i Aelodau ar 18 Chwefror 2008

Atebion a roddwyd i Aelodau ar 18 Chwefror 2008

[R] yn nodi bod yr Aelod wedi datgan buddiant.
[W] yn nodi bod y cwestiwn wedi’i gyflwyno yn Gymraeg.

Cynnwys

Cwestiynau i’r Dirprwy Brif Weinidog a’r Gweinidog dros yr Economi a Thrafnidiaeth

Cwestiynau i’r Gweinidog dros Dreftadaeth

Cwestiynau i’r Gweinidog dros Iechyd a Gwasanaethau Cymdeithasol

Cwestiynau i’r Gweinidog dros Gyfiawnder Cymdeithasol a Llywodraeth Leol

Cwestiynau i’r Dirprwy Brif Weinidog a’r Gweinidog dros yr Economi a Thrafnidiaeth

Nick Ramsay (Mynwy): Pa drafodaethau y mae’r Gweinidog wedi’u cael naill ai gydag Adran Drafnidiaeth y DU neu Severn River Crossings, ccc, ynghylch effaith economaidd tollau croesi Afon Hafren ar Gymru? (WAQ51257)

Y Dirprwy Brif Weinidog a’r Gweinidog dros yr Economi a Thrafnidiaeth (Ieuan Wyn Jones): Nid wyf wedi cael trafodaethau gyda Llywodraeth y DU na Severn River Crossings plc o ran yr effaith economaidd ar Gymru o dollau Pontydd Hafren. Fodd bynnag, pan fyddaf yn cyfarfod Ysgrifennydd Gwladol y DU dros Drafnidiaeth nesaf, rwyf yn gobeithio trafod y materion sy’n ymwneud â Phontydd Hafren.

Kirsty Williams (Brycheiniog a Sir Faesyfed): A wnaiff y Gweinidog amlinellu pa gynlluniau sydd gan Lywodraeth Cynulliad Cymru i wella cysylltiadau trafnidiaeth rhwng y dwyrain a’r gorllewin? (WAQ51271)

Y Dirprwy Brif Weinidog: Ieuan Wyn Jones: Nodir y cynlluniau ar gyfer cysylltiadau ffordd o’r Dwyrain i’r Gorllewin ym Mlaenraglen Cefnffyrdd 2002 ac fe’u diweddarwyd yn 2004. Gellir gweld y rhain fel codau lliw: Melyn, Dwyrain-Gorllewin (De); Pinc, Dwyrain-Gorllewin (Canolbarth); Gwyrdd, Dwyrain-Gorllewin (Gogledd) yn y cynllun atodedig.

O ran y rheilffordd, rwy’n cyfrannu hyd at £8 miliwn i’r arian cyfalaf ar gyfer y gwelliannau sydd ar fin digwydd i seilwaith Rheilffordd Cambrian rhwng Aberystwyth a’r Amwythig. Bydd y buddsoddiad yn darparu ar gyfer gwelliant sylweddol o ran prydlondeb gwasanaethau trenau ac yn ei gwneud yn bosibl i gael gwasanaethau trenau mwy rheolaidd yn y dyfodol.

Byddaf yn cyhoeddi Strategaeth Drafnidiaeth ddiwygiedig Cymru yn fuan, a fydd yn defnyddio cyfraniadau a dderbyniwyd yn ystod yr ymgynghoriad blaenorol. Bydd hyn yn arwain at Gynllun Trafnidiaeth Cenedlaethol Cymru fwy manwl a Blaenraglen Cefnffyrdd wedi’i diweddaru.

Cwestiynau i’r Gweinidog dros Dreftadaeth

Huw Lewis (Merthyr Tudful a Rhymni): A wnaiff y Gweinidog ddarparu’r wybodaeth ddiweddaraf am y trafodaethau y mae wedi bod yn eu cael gyda chyd-Weinidogion ynghylch defnyddio asedau nas hawliwyd yng Nghymru? (WAQ51233)

Y Gweinidog dros Dreftadaeth (Rhodri Glyn Thomas): Ystyriodd Llywodraeth Cynulliad Cymru y defnydd o arian sydd ar gael o dan Gynllun Cyfrifon Segur ym mis Rhagfyr 2007. Caiff ymgynghoriad cyhoeddus ei lansio maes o law.

Cwestiynau i’r Gweinidog dros Iechyd a Gwasanaethau Cymdeithasol

Jonathan Morgan (Gogledd Caerdydd): Faint o ymgynghorwyr sy’n gweithio mewn adrannau damweiniau ac achosion brys o’i gymharu â 1999? (WAQ51292)

Y Gweinidog dros Iechyd a Gwasanaethau Cymdeithasol (Edwina Hart): Gellir gweld y wybodaeth ddiweddaraf sydd ar gael am nifer yr ymgynghorwyr sy’n gweithio mewn adrannau damweiniau ac achosion brys o gymharu ag 1999 ar wefan StatsCymru.

Jonathan Morgan (Gogledd Caerdydd): A wnaiff y Gweinidog restru’r holl brosiectau cyfalaf yn y GIG yn yr wyth mlynedd ariannol diwethaf lle defnyddiwyd menter cyllid preifat, a’r holl gostau a oedd yn gysylltiedig â hwy? (WAQ51293)

Edwina Hart: Rhestrir pob prosiect cyfalaf yn y GIG lle defnyddiwyd Menter Cyllid Preifat yn yr wyth flwyddyn ariannol ddiwethaf a’r taliadau unedol blynyddol a wnaed i’r contractiwr Menter Cyllid Preifat isod.

Cwestiynau i’r Gweinidog dros Gyfiawnder Cymdeithasol a Llywodraeth Leol

Nick Bourne (Canolbarth a Gorllewin Cymru): Pa drafodaethau y mae’r Gweinidog wedi’u cael gyda San Steffan ynghylch defnyddio Mentrau Cyllid Preifat a Phartneriaethau Cyhoeddus Preifat eraill ar gyfer darparu gwasanaethau cyhoeddus gan awdurdodau lleol yng Nghymru? (WAQ51222)

Nick Bourne (Canolbarth a Gorllewin Cymru): A wnaiff y Gweinidog ddatganiad ynghylch pa adolygiad y mae Llywodraeth Cynulliad Cymru wedi’i roi yng nghyswllt defnyddio Mentrau Cyllid Preifat a Phartneriaethau Cyhoeddus Preifat eraill gan awdurdodau lleol? (WAQ51224)

Nick Bourne (Canolbarth a Gorllewin Cymru): A wnaiff y Gweinidog ddatganiad am gost unrhyw Fentrau Cyllid Preifat a chontractau Partneriaeth Cyhoeddus Preifat eraill y mae awdurdodau lleol yng Nghymru wedi ymrwymo iddynt er 1999? (WAQ51225)

Nick Bourne (Canolbarth a Gorllewin Cymru): A wnaiff y Gweinidog restru unrhyw Fentrau Cyllid Preifat a chontractau Partneriaeth Cyhoeddus Preifat eraill y mae awdurdodau lleol yng Nghymru wedi ymrwymo iddynt er 1999? (WAQ51226)

Y Gweinidog dros Gyfiawnder Cymdeithasol a Llywodraeth Leol (Brian Gibbons): Rwy’n ymateb i’r cwestiynau a restrir gyda’i gilydd gan eu bod yn mynd i’r afael â materion tebyg yn ymwneud â’r defnydd o’r Fenter Cyllid Preifat ac o fodelau Partneriaethau Preifat Cyhoeddus ehangach mewn awdurdodau lleol.

Nid wyf wedi trafod y defnydd o Fenter Cyllid Preifat a Phartneriaethau Preifat Cyhoeddus eraill gyda San Steffan, ac nid yw Llywodraeth Cynulliad Cymru wedi adolygu eu defnydd mewn awdurdodau lleol.

Yng Nghymru, mae awdurdodau lleol yn gweithredu at gyfrifoldeb a rennir wrth gyflwyno gwasanaethau cyhoeddus. Mae ganddynt ryddid a hyblygrwydd i ddarparu gwasanaeth ymreolaethol a chânt fynediad i arian y sector preifat drwy bwerau benthyca darbodus neu drefniadau eraill. .

Atodaf restr o gynlluniau awdurdodau lleol y gofynnwyd amdani isod a gaiff eu cefnogi gan y Cynulliad drwy Gredydau Menter Cyllid Preifat. Fodd bynnag, bydd cynlluniau ychwanegol a ariennir naill ai’n gyhoeddus neu drwy Bartneriaethau Preifat Cyhoeddus, yn fater i bob awdurdod unigol ac felly ni chânt eu rhestru yma.