Cynigion a Gwelliannau i’w Trafod ar 25 Medi 2013
Cynigion a gyflwynwyd ar 18 Medi 2013
Dadl Fer
NDM5305
Julie James (Gorllewin Abertawe): Manteision Canmlwyddiant Dylan Thomas i Gymru
NDM5302
William Graham (Dwyrain De Cymru)
Cynnig bod Cynulliad Cenedlaethol Cymru:
1. Yn nodi bod gan fwyafrif y plant a gaiff eu gwahardd neu eu dysgu y tu allan i leoliad ysgol anghenion dysgu ychwanegol neu arbennig, eu bod yn fechgyn, y gallant hawlio prydau ysgol am ddim, eu bod yn blant sy’n derbyn gofal, neu y cânt eu dysgu’n aml mewn uned cyfeirio disgyblion;
2. Yn cydnabod yr anghysondebau rhwng awdurdodau lleol ynghylch addysg y tu allan i leoliad ysgol;
3. Yn annog Llywodraeth Cymru i ostwng y cyfnod gorfodol lle mae gofyn i awdurdodau lleol ddarparu addysg i ddisgyblion wedi’u gwahardd; a
4. Yn galw am roi strategaeth gydlynol ar waith ar gyfer disgyblion a gaiff eu dysgu y tu allan i leoliad ysgol, er mwyn monitro a gwella eu cyfleoedd a’u canlyniadau addysgol.
NDM5304
Elin Jones (Ceredigion)
Cynnig bod Cynulliad Cenedlaethol Cymru
1. Yn nodi bod galwad olaf am dystiolaeth y Comisiwn ar Ddatganoli yng Nghymru (Comisiwn Silk) yn dod i ben ddydd Gwener, 27 Medi 2013.
2. Yn nodi bod y gwaith ymchwil a wnaethpwyd ar ran Comisiwn Silk yn dangos cefnogaeth sylweddol dros roi rhagor o bwerau i Gynulliad Cenedlaethol Cymru, gyda chefnogaeth benodol dros drosglwyddo pwerau ynni adnewyddadwy (70%), plismona (63%) a darlledu a rheoleiddio’r cyfryngau (58%).
3. Yn nodi ymhellach y gefnogaeth a welwyd y llynedd dros drosglwyddo pwerau ariannol, gyda 64% yn cefnogi trosglwyddo pwerau treth incwm i Lywodraeth Cymru, 80% yn cefnogi pwerau benthyca ar gyfer prosiectau seilwaith, a 72% o blaid trethi ‘cymell’.
4. Yn mynegi pryder bod Llywodraeth y DU wedi oedi cymaint cyn ymateb i adroddiad cyntaf Comisiwn Silk, ac yn galw ar Lywodraeth y DU i lynu wrth yr amserlen a nodwyd gan Gomisiwn Silk, a bod Llywodraeth Cymru a Llywodraeth y DU yn cyhoeddi eu hymatebion yn brydlon i’r ail adroddiad pan gaiff ei gyhoeddi’r gwanwyn nesaf.
NDM5306
Aled Roberts (Gogledd Cymru)
Cynnig bod Cynulliad Cenedlaethol Cymru:
1. Yn cydnabod pwysigrwydd y Grant Amddifadedd Disgyblion wrth helpu i dorri’r cysylltiad rhwng tlodi a thangyflawni addysgol, a chau’r bwlch cyrhaeddiad rhwng disgyblion o gefndiroedd difreintiedig a’r rheini o gefndiroedd mwy breintiedig.
2. Yn nodi’r gwaith ymchwil diweddar gan Ddemocratiaid Rhyddfrydol Cymru i effaith y Grant Amddifadedd Disgyblion yng Nghymru, sydd:
a) yn dangos bod y cyllid yn cael effaith gadarnhaol ar lefelau cyrhaeddiad plant o gefndiroedd tlotach ac ar wella hyder a phresenoldeb; a
b) yn archwilio ffyrdd o wella’r grant yn y dyfodol.
3. Yn nodi bod y cyllid ar gyfer y Premiwm Disgyblion yn Lloegr wedi cynyddu o un flwyddyn i’r llall, o £488 fesul disgybl cymwys yn 2011-12 i £1300 yn 2014-15 o’i gymharu â £450 fesul disgybl cymwys yng Nghymru.
4. Yn galw ar Lywodraeth Cymru i:
a) cynyddu’n sylweddol y cyllid ar gyfer y Grant Amddifadedd Disgyblion fesul disgybl yn y gyllideb nesaf;
b) archwilio’r manteision o ehangu’r Grant Amddifadedd Disgyblion i ddisgyblion o dan bump oed;
c) sicrhau bod y canllawiau ar y grant yn glir ac yn gryno ac yn rhoi blaenoriaeth i ddatblygu Pecyn Cymorth Ymddiriedolaeth Sutton ar gyfer Cymru;
d) darparu sicrwydd dros ddyfodol y Grant Amddifadedd Disgyblion a gwybodaeth amserol am ddyraniadau unigol i ysgolion;
e) annog ysgolion i gael polisi clir ar gyfer monitro a gwerthuso cadarn gan sicrhau nad yw’r broses yn or-fiwrocrataidd; ac
f) sefydlu fformiwla gyllido decach sy’n sicrhau bod y cyllid yn adlewyrchu’n gywir nifer y disgyblion o gefndiroedd difreintiedig a gaiff eu cefnogi gan gyllid y Grant Amddifadedd Disgyblion.
Mae’r gwaith ymchwil gan Ddemocratiaid Rhyddfrydol Cymru ar y Grant Amddifadedd Disgyblion ar gael yn:
http://welshlibdems.org.uk/en/document/learning-lessons-from-the-pupil-deprivation-grant.pdf
Gwelliannau a gyflwynwyd ar 20 Medi 2013
Cynnig bod y Cynulliad yn penderfynu mabwysiadu’r gwelliannau isod i gynigion:
NDM5302
1. Lesley Griffiths (Wrecsam)
Dileu pwyntiau 3 a 4 a rhoi’r canlynol yn eu lle:
Yn nodi:
a) bod Llywodraeth Cymru yn parhau i sicrhau bod Awdurdodau Lleol yn cyflawni eu dyletswyddau cyfredol mewn perthynas â darparu addysg i ddisgyblion sydd wedi’u gwahardd; a
b) y bydd Llywodraeth Cymru yn parhau i ganolbwyntio ar sicrhau bod polisïau ac arferion da yn cael eu gweithredu’n drylwyr i ofalu bod plant a addysgir y tu allan i leoliad ysgol yn cael gwell canlyniadau.
2. Aled Roberts (Gogledd Cymru)
Ym mhwynt 1, cynnwys ar ôl ‘blant sy’n derbyn gofal’:
‘eu bod o gefndiroedd difreintiedig, eu bod o gymunedau pobl dduon a lleiafrifoedd ethnig, eu bod mewn ysgolion neu ddosbarthiadau mawr,’
3. Aled Roberts (Gogledd Cymru)
Cynnwys pwynt 2 newydd ac ailrifo yn unol â hynny:
Yn gresynu wrth y diffyg cynnydd o ran helpu plant sydd wedi cael eu gwahardd o’r ysgol ers yr adroddiad ymchwil yn 2011 a gomisiynwyd gan Lywodraeth Cymru ar waharddiadau anghyfreithlon o’r ysgol yng Nghymru.
Mae’r adroddiad ar gael yn:
4. Aled Roberts (Gogledd Cymru)
Ym mhwynt 3, dileu popeth ar ôl ‘wedi’u gwahardd’ a chynnwys:
‘ac i adrodd ar y camau y mae’n eu cymryd i helpu’r plant hynny sydd wedi’u gwahardd neu’n cael eu dysgu y tu allan i leoliad ysgol i gael eu hailintegreiddio cyn gynted â phosibl;’
5. Aled Roberts (Gogledd Cymru)
Cynnwys pwynt 4 newydd ac ailrifo yn unol â hynny:
Yn galw ar Lywodraeth Cymru i archwilio i ba raddau y mae cyrsiau hyfforddi athrawon yn arfogi athrawon â’r sgiliau angenrheidiol i gefnogi myfyrwyr sydd mewn perygl o gael eu gwahardd neu sy’n cael eu dysgu y tu allan i leoliad ysgol.
6. Aled Roberts (Gogledd Cymru)
Cynnwys ar ddiwedd pwynt 4:
‘a bod Llywodraeth Cymru yn nodi’r camau y bydd yn eu cymryd i weithredu argymhellion adroddiad 2013 ar werthuso’r ddarpariaeth addysg i blant a phobl ifanc sy’n cael eu dysgu y tu allan i’r ysgol.’
Mae’r adroddiad ar gael yn:
NDM5304
1. William Graham (Dwyrain De Cymru)
Cynnwys pwynt 1 newydd ac ailrifo yn unol â hynny:
Yn croesawu ymrwymiad Llywodraeth y DU i greu gwell trefn lywodraethu i Gymru o fewn y Deyrnas Unedig drwy gyflwyno’r refferendwm ar bwerau deddfu sylfaenol i Gynulliad Cenedlaethol Cymru a sefydlu’r Comisiwn ar Ddatganoli yng Nghymru (Comisiwn Silk) ar bwerau ac atebolrwydd ariannol Cynulliad Cenedlaethol Cymru.
2. William Graham (Dwyrain De Cymru)
Dileu pwynt 4 a rhoi yn ei le:
Yn cydnabod bod angen ystyried ac asesu Rhan I Silk, Grymuso a Chyfrifoldeb, yn ofalus o ran ei heffaith ar rannau eraill o’r Deyrnas Unedig a’r manteision i Gymru ac, ar ôl cwblhau’r asesiadau hynny, edrych ymlaen at gyflwyno’n brydlon y mesurau a amlinellwyd yn Rhan I Silk i greu gwell atebolrwydd dros gyllid Cymru.
Mae Rhan I Silk ar gael yn:
http://commissionondevolutioninwales.independent.gov.uk/cy/
3. Aled Roberts (Gogledd Cymru)
Cynnwys pwynt 1 newydd ac ailrifo yn unol â hynny:
Yn croesawu’r ffaith fod Llywodraeth y DU wedi sefydlu Comisiwn Silk, yn unol â’r ymrwymiad yng nghytundeb clymblaid Llywodraeth y DU.
4. Aled Roberts (Gogledd Cymru)
Cynnwys pwynt 4 newydd ac ailrifo yn unol â hynny:
Yn cefnogi datganoli pwerau ariannol dros drethi a benthyca fel yr argymhellwyd gan Ran I Comisiwn Silk.
Mae Rhan I Silk ar gael yn:
http://commissionondevolutioninwales.independent.gov.uk/cy/
NDM5306
1. William Graham (Dwyrain De Cymru)
Cynnwys pwynt 2 a) newydd ac ailrifo yn unol â hynny:
Yn gresynu wrth y diffyg eglurder o ran deall a gweithredu’r Grant Amddifadedd Disgyblion ar draws yr ysgolion a arolygwyd.