Cynnwys
— Trosolwg
— Mynd i gyfarfod pwyllgor fel tyst
Paratoi i fod yn dyst
Fel tyst, darllen drwy’r canllaw hwn yw un o’r ffyrdd gorau y gallwch baratoi ar gyfer cyfarfod pwyllgor.
Cyn y cyfarfod fe allwch chi gysylltu â thîm clercio’r pwyllgor, a fydd yn gallu gwneud y canlynol:
- siarad â chi am sut mae pwyllgorau'n gweithio
- esbonio pam y cawsoch eich gwahodd i fod yn dyst
- rhoi gwybodaeth am bwy arall sydd wedi cael gwahoddiad
Cyn y cyfarfod, fe allwch chi hefyd gymryd y camau canlynol:
- edrych ar y gwaith y mae’r pwyllgor wedi’i wneud yn barod
- gwylio pobl eraill yn rhoi tystiolaeth i bwyllgorau ar Senedd.tv
Pwy sydd mewn cyfarfod pwyllgor?
Fe fyddwch chi’n gweld nifer o bobl yn y cyfarfod.
Aelodau o’r Senedd: O wahanol grwpiau gwleidyddol (neu ddim grŵp gwleidyddol). Mae un o’r Aelodau hefyd yn cadeirio’r pwyllgor. Dewch i wybod pa Aelodau o'r Senedd sy'n perthyn i'r pwyllgor rydych chi'n mynd iddo.
Clercod: Yn gyfrifol am baratoi a threfnu cyfarfodydd, a rhediad cyffredinol y pwyllgorau. Nhw yw eich prif bwynt cyswllt.
Ymchwilwyr: Arbenigwyr diduedd ar bwnc penodol, sy'n cefnogi aelodau pwyllgorau, a’r pwyllgorau eu hunain.
Cynghorwyr cyfreithiol: Cynghori’r pwyllgor ar bwyntiau cyfreithiol, ac unrhyw faterion cyfreithiol.
Swyddog cymorth y pwyllgor: Y person a fydd yn eich tywys chi i'r ystafell gyfarfod os byddwch yn dod i’r safle ar gyfer y cyfarfod.
Cyfieithwyr ar y pryd, a pheirianwyr darlledu: Yn cyfieithu o'r Gymraeg i'r Saesneg (neu ieithoedd eraill, os gofynnir ymlaen llaw) ac yn gwneud yn siŵr bod y dechnoleg yn rhedeg yn esmwyth.
Y cyhoedd (gan gynnwys newyddiadurwyr): Fe allan nhw wylio yn yr oriel gyhoeddus.
Swyddogion diogelwch: Os byddwch chi’n mynd i’r cyfarfod ar y safle.
All pobl eraill fynd i gyfarfodydd pwyllgor?
Ni waeth a gynhelir y cyfarfod ar y safle, trwy ddull hybrid neu wyneb yn wyneb, mae tystion fel arfer yn rhoi tystiolaeth yn gyhoeddus.
Mae hyn yn golygu y gall aelodau’r cyhoedd wneud y canlynol:
- archebu tocynnau ac eistedd yn yr oriel gyhoeddus ar gyfer unrhyw gyfarfodydd a gynhelir ar y safle, neu mewn fformat hybrid
- gwylio'n fyw, neu'n hwyrach, ar Senedd.tv
Beth ddylwn i ei wneud os nad wyf fi eisiau bod yn dyst?
Eich llesiant
Mae eich llesiant yn bwysig i ni. Os oes gyda chi unrhyw bryderon ynghylch rhoi tystiolaeth lafar, cysylltwch â thîm clercio’r pwyllgor wnaeth eich gwahoddodd. Fe allwn ni drafod eich pryderon, a chynghori ar y camau nesaf.
Preifatrwydd
Mae pwyllgorau'n ceisio bod mor agored a thryloyw yn eu gwaith ag y gallan nhw fod. Fodd bynnag, os oes gennych resymau penodol dros ddiogelu eich hunaniaeth, neu bryderon am eich preifatrwydd, cysylltwch â thîm clercio’r pwyllgor wnaeth eich gwahodd. Fe allan nhw drafod hyn gyda chi, ac ystyried trefniadau posibl.
Hawlio treuliau
Os yw cost mynd i’r pwyllgor yn rhwystr i chi, cysylltwch â thîm clercio’r pwyllgor i drafod opsiynau ar gyfer cymorth.