Y Gweinidog Cabinet dros Gyllid
Prif
ddiddordebau a chyflawniadau
Mae Elin wedi byw
yn Llanwnnen, Caerdydd, Aberystwyth a nawr Aberaeron. Mae hi'n mwynhau
cerddoriaeth a'r celfyddydau. Mae wedi canu mewn corau amrywiol a bu’n aelod
o’r grŵp harmoni clos,
Cwlwm, am flynyddoedd lawer. Mae treftadaeth a diwylliant Cymru yn bwysig iawn
i Elin. Bu'n helpu i gydlynu’r cerflun o Granogwen yn Llangrannog, helpu i amddiffyn wal Cofiwch
Dryweryn a bu'n rhan o Bwyllgor trefnu deiseb heddwch hanesyddol
merched Cymru. Elin oedd cadeirydd Eisteddfod Genedlaethol Ceredigion 2022
ac mae’n parhau i wasanaethu ar Fwrdd Rheoli’r Eisteddfod Genedlaethol ac yn
aelod o’r Orsedd.
Hanes personol
Ganed Elin ym
1966 ac fe’i magwyd ar fferm yn Llanwnnen, ger Llanbedr Pont Steffan. Aeth i
Ysgol Gynradd Llanwnnen ac Ysgol Uwchradd Llanbedr Pont Steffan. Ar ôl derbyn
gradd BSc mewn Economeg o Brifysgol Caerdydd, dyfarnwyd gradd MSc mewn Economeg
Wledig iddi o Brifysgol Aberystwyth.
Cefndir
proffesiynol
Fu Elin yn
Swyddog Datblygu Economaidd i Fwrdd Datblygu Cymru Wledig, ac roedd yn
gyfarwyddwr gyda Radio Ceredigion a chwmni cynhyrchu teledu Wes Glei Cyf.
Bu Elin ar Gyngor
Tref Aberystwyth o 1992 tan 1999 a hi oedd Maer ieuangaf Aberystwyth yn nhymor
1997-98. Elin oedd Cadeirydd Cenedlaethol Plaid Cymru rhwng 2000 a 2002.
Hanes
gwleidyddol
Fe'i hetholwyd
i'r Cynulliad ym mis Mai 1999 ac, yn nhymor cyntaf y Cynulliad, hi oedd
Gweinidog yr Wrthblaid dros Ddatblygiad Economaidd. Yn dilyn etholiad y
Cynulliad yn 2003, llwyddodd i ddal gafael ar y portffolio hwn tan 2006, pan
ddaeth hi’n Weinidog yr Wrthblaid dros yr Amgylchedd, Cynllunio a Chefn Gwlad.
Ar 9 Gorffennaf 2007, ffurfiwyd Llywodraeth Cymru’n Un a phenodwyd Elin yn
Weinidog dros Faterion Gwledig. Ddwy flynedd yn ddiweddarach, enillodd Elin
wobr Aelod Cynulliad y Flwyddyn, a gwobr ‘Pencampwr Ffermio’r DU’ y Farming
Weekly.
Yn 2016, etholwyd
Elin yn Lywydd y Cynulliad Cenedlaethol. Yn ei rôl fel Llywydd, mae Elin wedi
arwain ar sefydlu Senedd Ieuenctid i Gymru, ymestyn yr etholfraint bleidleisio
ar gyfer etholiadau Cymru i bobl ifanc 16 a 17 oed, wedi newid enw’r Cynulliad
Cenedlaethol i Senedd Cymru, ac wedi goruchwylio diwygio’r Senedd. Yn etholiad
diwethaf y Senedd yn 2021, etholwyd Elin am ail dymor i rôl Llywydd Senedd
Cymru.
