Prif ddiddordebau a chyflawniadau
Mae James wedi ymrwymo i sicrhau’r canlyniadau gorau posibl i gymunedau
ledled Brycheiniog Tawe Nedd. Mae ei brif ddiddordebau yn cynnwys cefnogi
busnesau lleol, gwella mynediad at ofal iechyd a gwasanaethau cyhoeddus o
ansawdd uchel, hyrwyddo amaethyddiaeth a chymunedau gwledig, a sicrhau
buddsoddiad teg ym mhob rhan o'r etholaeth. Cafodd James ei fagu ar fferm
deuluol, ac mae ganddo ddiddordeb penodol mewn amaethyddiaeth, yr amgylchedd a
dyfodol cefn gwlad Cymru. Ym mis Mehefin 2026, cafodd ei ethol yn Gadeirydd
Pwyllgor Newid Hinsawdd, yr Amgylchedd, Cynaliadwyedd a Materion Gwledig y
Senedd. Mae gan James ddiddordeb hirsefydlog mewn rygbi, ac mae'n falch o’r
ffaith ei fod wedi bod yn gapten ar ail dîm Clwb Rygbi Gwernyfed. Mae hefyd yn
mwynhau cadw'n heini a cherdded yn y wlad gyda'i sbaengi, Bonnie.
Hanes personol
Cafodd James ei eni a’i fagu yn ardal Brycheiniog a Sir Faesyfed, sydd
bellach yn rhan o etholaeth Brycheiniog Tawe Nedd. Yn sgil ei brofiad o dyfu i
fyny ar fferm deuluol, gwnaeth James feithrin angerdd gydol oes dros yr awyr
agored, amaethyddiaeth a'r cyfraniad pwysig y mae ffermio yn ei wneud i
economi, amgylchedd a chymunedau Cymru. Yn ystod ei arddegau, roedd James yn
weithgar ym mudiad y Ffermwyr Ifanc. Teithiodd o amgylch yr ardal, gan wneud
ffrindiau am oes, datblygu sgiliau ymarferol, a meithrin dealltwriaeth gref o
gymunedau gwledig. Ni wnaeth James ddilyn y llwybr traddodiadol i fyd
gwleidyddiaeth. Yn hytrach na mynd i’r brifysgol, datblygodd ei sgiliau a'i
brofiad drwy gyflogaeth a gwasanaeth cyhoeddus. Mae wedi ymrwymo o hyd i
gynrychioli cymunedau Brycheiniog Tawe Nedd a helpu pobl o bob cefndir i
gyflawni eu potensial.
Hanes gwleidyddol
Yn 2017, cafodd James ei ethol fel Cynghorydd Sir dros ward Gwernyfed, ac
yna gwasanaethodd fel aelod o gabinet Cyngor Sir Powys. Ym mis Mai 2021, cafodd ei ethol i'r Senedd
fel yr Aelod dros Frycheiniog a Sir Faesyfed. Cafodd ei ail-ethol i'r Senedd ym
mis Mai 2026, fel un o’r Aelodau sy’n cynrychioli etholaeth newydd Brycheiniog
Tawe Nedd. Ym mis Mehefin 2026, cafodd James ei ethol yn Gadeirydd Pwyllgor
Newid Hinsawdd, yr Amgylchedd, Cynaliadwyedd a Materion Gwledig y Senedd.
