Etholwyd Darren i
Senedd Cymru am y tro cyntaf yn 2007, i gynrychioli etholaeth Gorllewin Clwyd,
fel yr oedd ar y pryd. Mae bellach ar ei bumed tymor o wasanaeth, ac wedi bod
yn cynrychioli etholaeth Clwyd ers mis Mai 2026.
Cyn cael ei ethol i'r
Senedd, bu Darren yn gweithio fel rheolwr mewn elusen ryngwladol sy’n cefnogi
Cristnogion sy’n cael eu herlid ar draws y byd. At hynny, bu’n gyfrifydd yn
gweithio yn y diwydiannau adeiladu, cartrefi gofal a thelathrebu.
Ar ôl cael ei fagu yn
Nhywyn, mae Darren bellach yn byw ym Mae Cinmel gyda'i wraig a'u dau blentyn,
sy’n blant hŷn erbyn hyn.
Ym mis Rhagfyr 2024,
cafodd Darren ei ethol yn unfrydol i fod yn Arweinydd Grŵp y Ceidwadwyr Cymreig yn y Senedd, a bu’n gwasanaethu fel Arweinydd yr Wrthblaid yn y Senedd tan
ddechrau 2026.
Yn ystod ei gyfnod fel
Aelod o Senedd Cymru, mae Darren wedi bod yn gyfrifol am amryw o bortffolios yr
wrthblaid, gan gynnwys Iechyd, Addysg, Llywodraeth Leol, y Cyfansoddiad,
Gogledd Cymru a Materion Rhyngwladol. At hynny, bu’n gwasanaethu fel Prif Chwip
y Ceidwadwyr Cymreig ac fel Cadeirydd Pwyllgor Cyfrifon Cyhoeddus dylanwadol y
Senedd.
Mae Darren yn un o
sylfaenwyr Grŵp Trawsbleidiol y
Senedd ar Ffydd a'r Grŵp Trawsbleidiol ar y
Lluoedd Arfog a'r Cadetiaid, ac yn Cyn-gadeirydd ar y naill grŵp a’r llall.
Yn 2000/2001, Darren
oedd y maer ieuengaf i wasanaethu yng Nghymru pan ddaeth yn faer ar drefgordd
Tywyn a Bae Cinmel, ac mae Darren ar ddeall nad oes maer ifancach wedi bod hyd
yn hyn. At hynny, bu’n aelod o Gyngor Bwrdeistref Sirol Conwy, Awdurdod Heddlu
Gogledd Cymru a Gwasanaeth Tân ac Achub Gogledd Cymru.
Mae Darren yn Gristion
ymroddedig, yn ddarllenydd brwd ac yn seryddwr amatur.
