Cyflogau Deiliaid Swyddi

Heddiw, cyhoeddodd y Bwrdd Taliadau annibynnol fanylion am y cyflogau ychwanegol a fydd yn cael eu talu i ddeiliaid swyddi yn y Pedwerydd Cynulliad.

Bydd y rhain yn cael eu rhewi am bedair blynedd.

Dywedodd y Gwir Anrhydeddus George Reid, Cadeirydd y Bwrdd: “Rydym ni o’r farn bod ein penderfyniadau yn deg, yn glir ac yn gynaliadwy.”

“Maent yn briodol i Gymru, yn cynrychioli gwerth am arian ac yn adlewyrchu cyfrifoldebau Aelodau Cynulliad sy’n ddeiliaid swyddi ychwanegol.”

Ychwanegodd Mr Reid bod y Bwrdd, yn dilyn tystiolaeth lafar ac ysgrifenedig helaeth, yn cydnabod pwerau deddfwriaethol ychwanegol y Pedwerydd Cynulliad – a’i bwrpas sylfaenol o graffu ar ddeddfwriaeth, dwyn y Llywodraeth i gyfrif, a chynrychioli pobl Cymru.

Bydd cadeiryddion wyth Pwyllgor yn cael cyflog o £12,420 yr un. Mae hyn yn cydnabod cynnydd yng nghyfrifoldeb pump ohonynt, sy’n cyfuno swyddogaethau deddfwriaethol a chraffu, a rôl tebyg tri phwyllgor arall i graffu ar gynigion y Llywodraeth.

Bydd cadeiryddion dau Bwyllgor llai yn cael cyflog o £8,280 yr un.

Bydd Comisynwyr y Cynulliad hefyd yn cael £12,420 yr un. Mae hyn yn cydnabod eu cyfrifoldebau o lywodraethu a chyllido’r ddeddfwrfa’n dda, a’u hymrwymiad i rôl sydd yn fwy colegol ac yn fwy rhagweithiol. Bydd taliadau i chwipiau’n dod i ben.

Dywedodd Mr Reid: “Nid yw’n briodol bod pwrs y wlad yn talu am swydd sy’n ymwneud â swyddogaethau pleidiau gwleidyddol yn eu hanfod.”

Fodd bynnag, mae rôl rheolwyr busnes i drefnu a chytuno ar fusnes y Cynulliad wedi’i chydnabod.

Byddant yn cael cyflog sylfaenol o £6,210 ac elfen gyfraneddol o £250 am bob aelod yn eu grwp, gyda chap ar y cyflog hwn o £12,420.

Roedd yr holl dystiolaeth a gyflwynwyd i’r Bwrdd yn nodi mai gan arweinwyr y gwrthbleidiau roedd y lefel uchaf o gyfrifoldeb y tu allan i’r Llywodraeth. Nododd Mr Reid: “Mae’n rhaid iddynt fod â gafael ar bopeth, o bolisi i gyfeiriad mewnol, ac mae’n rhaid iddynt gael gweledigaeth wahanol i Gymru sy’n wahanol i un y Prif Weinidog.

“Fodd bynnag, nid oeddem yn gallu derbyn y ffaith ei bod yn briodol i arweinydd yr wrthblaid fwyaf gael £30,000 yn fwy nag arweinydd yr wrthblaid nesaf, fel ddigwyddodd mewn blynyddoedd blaenorol. Mewn Cynulliad sy’n lled gymesurol, efallai mai dim ond ychydig o seddi sydd rhyngddynt, neu gallant fod â’r un nifer o aelodau. Rydym wedi datblygu ffordd o gyfrifo cyflogau arweinwyr y gwrthbleidiau mewn ffordd sy’n deg, yn dryloyw ac yn addas i’r Pedwerydd Cynulliad.”

Yn y dyfodol, bydd arweinwyr y gwrthbleidiau yn cael cyflog o £12,420 ac elfen gyfraneddol o £1,000 ar gyfer pob sedd sydd gan yr wrthblaid. Yn y Pedwerydd Cynulliad, bydd arweinydd y Ceidwadwyr yn cael £26,420, arweinydd Plaid Cymru yn cael £23,240 ac arweinydd y Democratiaid Rhyddfrydol yn cael £17,420.

Mae hyn yn ostyngiad o £71,170 (7.2%) o’i chymharu â’r Trydydd Cynulliad. Gweler y tabl isod.

Dywedodd Mr Reid: “Ar ôl astudio sgiliau a chyfrifoldebau y swyddi ychwanegol, mae’r Bwrdd wedi penderfynu perthnasedd sydd ynghlwm â’r swyddi, a phennu system eglur y gellir ei defnyddio mewn Cynulliadau yn y dyfodol”.

Adroddiad : Taliadau Deiliaid Awyddi - Adroddiad Bwrdd Taliadau Cynulliad Cenedlaethol Cymru (Gorffennaf 2011)

Cyfanswm cyflogau ychwanegol i ddeiliaid swyddi^[4]