Un o Bwyllgorau'r Cynulliad Cenedlaethol yn datgan bod angen cynllun clir ar entrepreneuriaid ifanc i ganfod eu ffordd drwy fyd cymhleth busnes
14 Tachwedd 2013
Yn ôl un o Bwyllgorau'r Cynulliad Cenedlaethol, mae angen cynllun clir ar entrepreneuriaid ifanc yng Nghymru i ganfod eu ffordd drwy gymhlethdodau'r broses o ddechrau eu busnes eu hunain.
Yn ystod ei ymchwiliad, clywodd y Pwyllgor gan berchenogion busnes ifanc a gyfeiriodd at y diffyg menter o fewn y system addysg yng Nghymru.
Amlygodd yr entrepreneuriaid ifanc hefyd y cyngor a'r wybodaeth anghyson sydd ar gael, yn ogystal â'r ffaith bod gormod o fiwrocratiaeth, anhyblygrwydd ac oedi o ran y systemau grantiau.
Dywedodd Nick Ramsay AC, Cadeirydd y Pwyllgor Menter a Busnes: "Cafodd y pwyllgor ei ysbrydoli gan y perchenogion busnes ifanc a gyfrannodd at yr ymchwiliad hwn."
"Gwnaeth ymrwymiad Llywodraeth Cymru i hyrwyddo entrepreneuriaeth a'r ystod o fentrau sydd wedi'u rhoi ar waith i sicrhau'r nod hwnnw greu argraff arnom hefyd.
"Ond mae'r gwahaniaeth rhwng nifer y bobl ifanc sydd am ddechrau eu busnes eu hunain a'r rheini sy'n gwneud hynny mewn gwirionedd yn peri pryder. Hoffem i Lywodraeth Cymru ganfod pam mae hyn yn digwydd a beth yw'r ffordd orau o ddatrys y broblem.
"Rydym hefyd am weld entrepreneuriaeth yn cael mwy o sylw yn y system addysg yng Nghymru, o ysgolion cynradd i brifysgolion.
"Mae'n amlwg ini fod y byd llawn cyfleoedd a gynigir i'r rheini sydd am ddechrau eu busnes eu hunain yn llawn rhwystrau mewn gwirionedd.
"Credwn fod angen i Lywodraeth Cymru symleiddio'r broses hon, gan sefydlu siopau un stop lle y gall perchenogion busnes ifanc gael cyngor arbenigol clir."
Mae'r Pwyllgor yn gwneud 10 o argymhellion i Lywodraeth Cymru yn ei adroddiad, sy'n cynnwys:
Ymchwilio i’r diffyg cysylltiad rhwng lefel y diddordeb a’r awydd am entrepreneuriaeth ymysg yr ifanc a nifer gwirioneddol y busnesau a gaiff eu dechrau gan bobl ifanc, a darganfod beth yw’r ffordd orau o gau’r bwlch hwnnw.
Sicrhau bod entrepreneuriaeth ac entrepreneuriaeth gymdeithasol yn rhan annatod o’r cwricwlwm mewn addysg gynradd, uwchradd, addysg bellach ac addysg uwch yn hytrach nag yn rhywbeth sydd wedi’i ychwanegu ar y diwedd, gan osod sgiliau mentergarwch wrth galon y system addysg yng Nghymru.
Penderfynu pwy ddylai ymgymryd â’r rôl o ddarparu porth cyngor a chyfarwyddyd canolog ar gyfer entrepreneuriaid ifanc a darpar entrepreneuriaid ifanc, a datblygu cynllun o ran yr opsiynau sydd ar gael, ac yna gweithio i sefydlu’r canolfannau hynny ledled Cymru.
Yn ystod ei ymchwiliad, aeth y Pwyllgor i ymweld â Sefydliad Alacrity yng Nghasnewydd a Chlwb Menter Sir y Fflint yng Nglannau Dyfrdwy i gael barn y perchenogion busnes ifanc a'u cynghorwyr a'u mentoriaid.
Gwnaeth tîm allgymorth y Cynulliad Cenedlaethol hefyd gynnal cyfweliadau ag entrepreneuriaid ifanc ledled Cymru.
Gellir gwylio fideos o'r cyfweliadau hynny ac ymweliad y Pwyllgor â Sefydliad Alacrity yma.