Prif ddiddordebau a chyflawniadau
Wedi'i geni yng Nghasnewydd, Natasha yw'r fenyw gyntaf o liw i gael ei
hethol i'r Senedd. Yn 2021, cafodd ei hethol yn Aelod rhanbarthol dros Ddwyrain
De Cymru. Yn y Seithfed Senedd, mae'n dychwelyd fel Aelod dros etholaeth
Casnewydd Islwyn.
Hanes personol
Mae cefndir Natasha ym maes y cyfryngau, gan gynnwys teledu, radio a
phrint, ac mae hi wedi gweithio’n flaenorol fel banciwr ac yn y Senedd. Cyn
cael ei hethol yn 2021, safodd Natasha fel ymgeisydd mewn sawl etholiad ar
gyfer y Senedd ac ar lefel y DU. Safodd ddwywaith dros hen etholaeth Dwyrain
Casnewydd, ac unwaith dros hen etholaeth Blaenau Gwent a Thorfaen.
Cefndir proffesiynol
Mae gan Natasha radd BA mewn Gwleidyddiaeth a Pholisi Cymdeithasol, ac mae
ganddi hefyd radd Meistr mewn Polisi Prydeinig Cyfoes a'r cyfryngau o Brifysgol
Llundain.
Hanes gwleidyddol
Ers cael ei hethol i’r Senedd am y tro cyntaf y 2021, mae Natasha wedi cael
ei chyfweld nifer o weithiau, gan y BBC, ITV, y South Wales Argus, The
National, y Caerphilly Observer, a chylchgrawn Golwg, ac mae wedi ymddangos ar
raglenni panel fel Sharp End. Cafodd Natasha ei disgrifio fel “grym dros newid”
gan British Vogue, ac yn 2021, cafodd ei henwi gan y BBC fel un o’r 100 o
fenywod mwyaf ‘dylanwadol ac ysbrydoledig’ yn y byd, ochr yn ochr â Malala
Yousavzai, Melinda Gates a’r actores Ming-Na Wen.
Yn ystod ei chyfnod fel Aelod Rhanbarthol dros Ddwyrain De Cymru, rhwng
2021 a 2026, gwnaeth Natasha fwy nag 800 o gyfraniadau yn y Senedd, cymerodd
ran mewn mwy na 450 o gyfarfodydd ac ymweliadau, a rhoddodd gymorth i oddeutu
5,000 o etholwyr.
Yn y chweched Senedd, roedd Natasha yn gyfrifol am sawl portffolio
cysgodol, gan gynnwys gwasanaethu fel Gweinidog yr Wrthblaid dros Drafnidiaeth.
Yn y rôl honno, arweiniodd yr ymgyrch yn y Senedd yn erbyn terfynau 20mya
diofyn, ac yn sgil y gwaith hwnnw, enillodd wobr Gwleidydd Datganoledig y
Flwyddyn yn y Gwobrau Bywyd Gwleidyddol a Chyhoeddus yn 2023. Ar ben hynny,
enillodd wobr ‘The Iron Lady of the Year’ gan Sefydliad Byd-eang MyDream yn
2025.
Rhwng 2024 a 2026, gwasanaethodd Natasha fel Gweinidog yr Wrthblaid dros
Blant, Pobl Ifanc ac Addysg, gyda chyfrifoldeb dros fenywod. Ymgyrchodd ym maes
disgyblaeth yn yr ystafell ddosbarth, addysgu sgiliau bywyd, a chydnabod
lleoedd un rhyw yn dilyn dyfarniad y Goruchaf Lys yn 2025.
Ar hyn o bryd, Natasha yw deiliad portffolio cysgodol y Ceidwadwyr Cymreig
dros Iechyd a Gofal Cymdeithasol, gan ddod â'r un angerdd a ffocws i'w
chyfraniadau yn y Senedd. Mae Natasha bob amser wedi bod yn frwdfrydig dros
wneud gwahaniaeth, ac mae'n credu'n gryf y dylai'r rhai sy’n gwasanaethu yn y
Llywodraeth "wneud yn ogystal â dweud”.
Arall
Yn ei bywyd personol, mae Natasha yn mwynhau teithio, treulio amser gyda'i
ffrindiau, coginio, gwylio ffilmiau, a gwneud gwaith elusennol.
