Caiff yr etholiad nesaf yng Nghymru ei gynnal ar 7 Mai 2026. P'un a ydych chi'n pleidleisio am y tro cyntaf neu ddim ond eisiau deall beth sydd wedi newid ers yr etholiad diwethaf, bydd y canllaw cyflym hwn yn eich helpu i fod yn barod.
Dyma bum peth i'ch helpu i deimlo'n hyderus ac yn wybodus:
1. Mae gan Gymru ei senedd ei hun – sef Senedd Cymru
Y Senedd yw’r lle mae penderfyniadau'n cael eu gwneud am lawer o agweddau ar fywyd yng Nghymru, fel iechyd, addysg, tai, trafnidiaeth a'r amgylchedd.
Mae Aelodau’r Senedd yn chwarae rhan hanfodol wrth graffu ar gynlluniau a gwariant Llywodraeth Cymru, ac yn awgrymu gwelliannau i wneud pethau’n well i bawb yng Nghymru.
Etholiad y Senedd yw eich cyfle i ddewis yr Aelodau hynny.
Dewch i gael gwybod mwy am sut mae’r Senedd yn gweithio a beth mae'n ei wneud.
2. Mae angen i chi fod wedi cofrestru i bleidleisio (ond dim ond 5 munud y mae'n ei gymryd)
Os ydych chi’n 16 oed neu'n hŷn ac yn byw yng Nghymru, fe allwch chi bleidleisio yn etholiad y Senedd 2026. Ond rhaid i chi gofrestru yn gyntaf.
Mae cofrestru ar-lein yn syml ac yn cymryd pum munud yn unig. Y dyddiad cau i gofrestru i bleidleisio’n bersonol yw 20 Ebrill.
Mae pleidleisio – yn y cnawd, drwy'r post neu drwy ddirprwy – yn golygu bod gennych lais yn nyfodol Cymru.
3. Mae eich pleidlais chi yn bwysig
Rhaid i bob plaid wleidyddol ac ymgeisydd annibynnol sydd am gael eu hethol i'r Senedd gofrestru erbyn 9 Ebrill.
Gallwch weld pwy yw’r ymgeiswyr yn eich ardal chi a phenderfynu pwy fydd yn cael eich pleidlais drwy ymweld â gwefan y Comisiwn Etholiadol ar ôl y 9 Ebrill.
Ar ddiwrnod yr etholiad, bydd gennych chi un bleidlais i’w rhoi i blaid neu ymgeisydd annibynnol. Mae eich pleidlais chi yn bwysig. Chi sy’n penderfynu sut i fwrw eich pleidlais.
4. Mae'r etholiad ar ddydd Iau 7 Mai
Os ydych chi'n mynd allan i bleidleisio, bydd eich cerdyn pleidleisio yn dweud wrthych chi ble mae angen i chi fynd i fwrw’ch pleidlais ar ddiwrnod yr etholiad – hon yw eich gorsaf bleidleisio. Byddwch yn pleidleisio mewn lle agos i’ch cartref, fel ysgol neu ganolfan gymunedol.
Bydd gorsafoedd pleidleisio ar agor o 07:00 tan 22:00 ar 7 Mai. Nid oes angen i chi fynd â'ch cerdyn pleidleisio nac unrhyw ddogfen adnabod gyda chi.
Os hoffech chi gael rhagor o wybodaeth am yr hyn sy'n digwydd ar ddiwrnod yr etholiad, mae gwybodaeth ar:
- wefan y Comisiwn Etholiadol
- darllenwch ein blog Beth sy'n digwydd mewn gorsaf bleidleisio?
5. Gallwch ymweld ag adeilad y Senedd – eich senedd chi yw hi
Mae adeilad y Senedd ym Mae Caerdydd ar agor drwy gydol y flwyddyn a bydd ar agor fel arfer yn ystod cyfnod yr etholiad. Mae mynediad am ddim.
Dewch i’n gweld ni ym Mae Caerdydd a mynd ar daith, ewch i’r ardal chwarae, gallwch weld yr arddangosfa ddiweddaraf, gwrando ar ddadl, neu fwynhau’r olygfa dros baned yn y caffi.
Mae rhywbeth yn digwydd bob amser – gallwch ddarganfod beth sy'n digwydd yn y Senedd.
Eich Cymru chi. Eich pleidlais chi. Gwnewch eich marc. Ewch i'n gwefan etholiad i ddysgu rhagor.
Gwybodaeth gyffredinol
Etholaethau newydd
System bleidleisio newydd
- Sut bydd y system bleidleisio newydd yn gweithio yn etholiad y Senedd yn 2026?
- Etholiad y Senedd 2026: Beth yw fformiwla D'Hondt a sut mae'n gweithio?
