Mae Cynulliad Cenedlaethol Cymru wedi ennill gwobr o fri sy'n cydnabod ei ymrwymiad i ddarparu amgylchedd gweithio sy'n ystyriol o deuluoedd.
Corff deddfu Cymru yw'r unig sefydliad yng Nghymru a farnwyd yn un o'r 10 cyflogwr gorau yn y DU gan sefydliad y Cyflogwyr Gorau i Deuluoedd sy'n Gweithio (TEWF).
Mae safon TEWF yn feincnod arfer da a gaiff ei gydnabod gan ddiwydiant yng nghyswllt darparu amgylchedd gweithio sy'n galluogi pobl i gael cydbwysedd da rhwng bywyd a gwaith.
Golyga hyn fod y Cynulliad yn ymuno â 100 cwmni'r FTSE, ymysg elît Prydain yn y maes hwn.
Dywedodd Elin Jones AC, Llywydd Cynulliad Cenedlaethol Cymru:
"Mae'r holl ymchwil yn dangos bod gweithlu sydd â chydbwysedd da rhwng bywyd a gwaith yn weithlu effeithiol a chreadigol."
"Mae Cynulliad Cenedlaethol Cymru yn cydnabod bod hyblygrwydd yn galluogi gweithwyr i lwyddo yn y gwaith ac i gyflawni eu hymrwymiadau teuluol a all newid.
“Mae'n bwysig helpu pobl yng Nghymru sy'n gweithio i ddod o hyd i gydbwysedd priodol rhwng eu gwaith a meysydd eraill eu bywydau.
"Dyna pam mae'n bleser mawr llongyfarch pawb sydd a wnelont â'r maes hwn am y gydnabyddiaeth a roddwyd iddynt am eu gwaith rhagorol ac am ddatblygu polisïau sy'n cyd-fynd â'r arferion gorau."
Dywedodd Claire Clancy, Prif Weithredwr a Chlerc y Cynulliad:
"Rydym oll yn ymwybodol bod angen inni sicrhau cydbwysedd da rhwng bywyd a gwaith oherwydd gwyddom ei fod yn ein gwneud yn hapusach ac yn fwy effeithiol, yn ein bywydau personol a phroffesiynol.
"Rydym yn disgwyl llawer iawn gan y bobl sy'n gweithio i'r Cynulliad ond yn gyfnewid rydym yn eu cefnogi drwy ein polisïau sy'n ystyriol o deuluoedd ac sy'n sicrhau cydbwysedd rhwng bywyd a gwaith. Rwy'n gweld yr effaith gadarnhaol bob dydd yn ein tîm anhygoel a'n gwasanaethau o ansawdd uchel."
Mae’r rhaglenni a’r polisïau sydd gan y Cynulliad i’w staff er mwyn bod yn ystyriol o deuluoedd yn cynnwys:
- Patrymau gweithio hyblyg – tymor yn unig, rhan-amser, oriau cywasgedig ac ati
- Oriau hyblyg
- Trefniadau gwell o ran cyfnod a thaliadau mamolaeth/tadolaeth/mabwysiadu/absenoldeb rhiant a rennir
- Aberthu Cyflog i gael Talebau Gofal Plant
- Polisi Gofalwyr
- Trefniadau Absenoldeb Arbennig
- Rhwydwaith rhieni a gofalwyr yn y gweithle
Daw'r wobr hon yn ystod yr Wythnos Genedlaethol Cydbwysedd Rhwng Bywyd a Gwaith, a drefnwyd gan TEWF, a lle mae'r Cynulliad wedi trefnu amrywiaeth o ddigwyddiadau mewnol i staff er mwyn hyrwyddo'r opsiynau sydd ar gael iddynt.