Dyma beth sydd angen i chi ei wybod:
Ers 25 mlynedd, mae nifer yr Aelodau yn y Senedd wedi aros yr un fath, er bod ganddi fwy o gyfrifoldebau erbyn hyn, fel pwerau deddfu llawn a’r gallu i newid rhai trethi yng Nghymru.
Bydd cael mwy o Aelodau yn helpu’r Senedd i wella’r ffordd mae’n archwili ac yn herio cynlluniau a gwariant Llywodraeth Cymru ar faterion pwysig megis ysbytai, ysgolion a thrafnidiaeth. Bydd hyn yn rhoi llais cryfach i'ch cymuned yn y penderfyniadau hyn.
Gyda 96 o Aelodau, mae nifer y cynrychiolwyr a fydd gennych chi yn y Senedd yn cyfateb i wledydd eraill o faint tebyg i Gymru - fel yr Alban sydd â 129 o Aelodau a Gogledd Iwerddon sydd â 90.
Beth sy'n newydd?
Bydd pleidleiswyr yn ethol 96 o Aelodau.
Bydd gennych chi chwe Aelod yn eich cynrychioli chi yn y Senedd.
Bydd yn rhaid i ymgeiswyr sy'n sefyll mewn etholiad fod yn byw yng Nghymru.
Os ydych chi dros 16 oed, gallwch chi bleidleisio yn etholiad y Senedd yn 2026. Byddwch chi’n cael un bleidlais i ddewis cynrychiolwyr ar gyfer eich cymuned yn y Senedd.
Enw’r system bleidleisio newydd yw’r 'system rhestr gyfrannol gaeedig'. Mae hyn yn golygu eich bod chi’n pleidleisio dros blaid wleidyddol neu ymgeisydd annibynnol, yn hytrach na phobl unigol.
Bydd y papur pleidleisio yn dangos y rhestr lawn o ymgeiswyr yn eich etholaeth, felly byddwch chi’n dal i allu gweld dros bwy rydych chi’n pleidleisio.
Os bydd plaid yn ennill digon o bleidleisiau, bydd yn ennill un neu fwy o seddi yn y Senedd. Os bydd ymgeisydd annibynnol yn ennill digon o bleidleisiau, bydd yn ennill sedd yn y Senedd.
Bydd seddau’n adlewyrchu canran y pleidleisiau y mae pob plaid neu ymgeisydd annibynnol yn ei chael.
Beth sy'n newydd?
Bydd gennych chi un bleidlais a phapur pleidleisio i ddewis eich cynrychiolwyr yn y Senedd, yn hytrach na dwy bleidlais ar wahân fel mewn etholiadau blaenorol.
Pan fyddwch chi'n pleidleisio, byddwch chi'n dewis plaid wleidyddol neu ymgeisydd annibynnol i’ch cynrychioli.
O 2026 ymlaen, bydd etholiadau’r Senedd yn cael eu cynnal bob pedair blynedd.
Bydd gan bob etholaeth newydd chwe Aelod, sy’n golygu y bydd cyfanswm o 96 Aelod yn cael eu hethol i’r Senedd.
Comisiwn Democratiaeth a Ffiniau Cymru sy'n gyfrifol am greu ardaloedd yr etholaethau newydd.
Beth sy'n newydd?
Bydd gan Gymru 16 o etholaethau.
Bydd pob etholaeth yn ethol chwe Aelod o’r Senedd.
Cynhelir Etholiad nesaf y Senedd ar neu cyn 7 Mai 2026.
Mae'r newidiadau i'r Senedd wedi bod yn destun nifer o ymgynghoriadau cyhoeddus. Mae'r rhai allweddol yn cynnwys:
I gael rhagor o wybodaeth am hanes diwygiadau i'r Senedd, gweler erthygl y Gwasanaeth Ymchwil: Diwygio’r Senedd – y stori hyd yma.
Bydd siambr drafod y Senedd, y Siambr, yn cael ei newid i ddarparu lle ar gyfer pob un o'r 96 o Aelodau. Bydd y gwaith yn dechrau ym mis Ebrill 2025 ac yn cael ei gwblhau yng ngwanwyn 2026.
