Fframwaith Rhyngwladol

Cytunwyd ar Fframwaith Rhyngwladol y Senedd ym mis Medi 2022 gan Gomisiwn y Senedd ac fe'i gweithredir gan swyddogion ar draws y sefydliad, gan gynnwys Swyddfa Breifat y Llywydd, Y Gwasanaeth Ymchwil a Phwyllgorau'r Senedd.

Mae'r Fframwaith yn  sicrhau atebolrwydd, eglurder a chyfeiriad mewn perthynas â gweithgarwch seneddol rhyngwladol a ariennir gan Gomisiwn y Senedd, ac mae’n seiliedig ar yr egwyddorion sydd ynghlwm wrth y ffaith y bydd ein gweithgareddau rhyngwladol:

1. Yn canolbwyntio ar fusnes y Senedd, gan alluogi’r Senedd i gyflawni ei swyddogaeth graidd, sef cynrychioli buddiannau Cymru a’i phobl, drwy wella’r broses o gyfnewid gwybodaeth, syniadau a phrofiad; ac
2. Yn cydnabod gwerth a phwysigrwydd meithrin enw da sefydliadol a rhyngwladol y Senedd drwy ymgysylltu a chydweithio, boed a yw’r gwaith hwnnw’n cael ei arwain gan Aelodau neu Bwyllgorau, neu a yw’n digwydd ar lefel swyddogion neu rhwng Seneddau.

Fframwaith Rhyngwladol y Chweched Senedd

Wrth weithredu'r Fframwaith, mae manylion gweithgareddau rhyngwladol, gan gynnwys adroddiadau a blogiau, yn cael eu rhannu'n rheolaidd ar y wefan hon. Mae diweddariadau ar gael yn y dolenni isod.

Mae’r Pwyllgor Diwylliant, Cyfathrebu, y Gymraeg, Chwaraeon,  a Chysylltiadau Rhyngwladol, wedi cyhoeddi’i adroddiad Sioc Ddiwylliannol: Diwylliant ar Berthynas Newydd gydir Undeb Ewropeaidd, sy’n gwneud 14 argymhelliad. Lansiwyd yr adroddiad ym Mrwsel fel rhan o ymweliad y Pwyllgor yna ym mis Tachwedd 2024.

Wedi i’r DU ymadael â’r UE, cafodd cyfundrefn fewnforio newydd ei llunio gan lywodraethau’r DU, Cymru a’r Alban a swyddogion o Ogledd Iwerddon, sef Model Gweithredu Targed y Ffin (BTOM). Cafodd ei gyhoeddi ym mis Awst 2023, ac roedd yn nodi amserlen ar gyfer cyflwyno rheolaethau masnach newydd ar ein holl fewnforion, gan gynnwys mewnforion o’r UE. 

Mae rhagor o fanylion wedi’u cynnwys yn erthygl Ymchwil y Senedd, Cymru a’r model newydd ar gyfer ffiniau masnach y DU, a chyhoeddodd y Pwyllgor Economi, Masnach a Materion Gwledig adroddiad cysylltiedig ym mis Hydref 2024, Model Gweithredu Targed y Ffin: Y darlun yng Nghymru 

Arewiniodd y Dirprwy Lywydd ddirprwyaeth traws-Bwyllgorol i Iwerddon ym mis Medi 2024. Ymunodd aelodau o’r Pwyllgorau Diwylliant, Cyfathrebu, yr iaith Gymraeg, Chwaraeon a Chysylltiadau Rhyngwladol, Pwyllgor Economi, Masnach, a Materion Gwledig, a’r Pwyllgor Newid Hinsawdd, yr Amgylchedd, a Seilwaith â’r ymweliad i Ddulyn rhwng 18-20 Medi, llu buon nhw’n cyfarfod â chymheiriaid o’r Oireachtas ynghyd â chynrychiolwyr Llywodraeth Cymru, Adran Materion Tramor Llywodraeth Iwerddon, Cyngor Celfyddydau Iwerddon a phartneriaid allweddol eraill. Roedd trafodaethau’n cynnwys gweithdrefnau seneddol, chwaraeon, diwylliant, ynni adnewyddadwy a Masnach, yn ogystal â’r Cyd-ddatganiad a Chynllun Gweithredu rhwng Iwerddon a Chymru.

Fel rhan o’r ymweliad, bu’r Dirprwy Lywydd yn cyfarfod â Dirprwy Lefarydd Steve Aiken ACD yng Nghynulliad Gogledd Iwerddon, yr ymweliad swyddogol cyntaf gan y Senedd i Stormont ers i’r Cynulliad ailddechrau.

Mae adroddiad o’r ymweliad wedi’i gyhoeddi, gydag awgrymiadau ar gyfer argymhellion i bob Pwyllgor.