Mae tri Map o Gymru gan y cerflunydd a'r gof enwog Angharad Pearce Jones yn cael eu harddangos yn barhaol yn y Senedd, gan ganiatáu i ymwelwyr ddysgu am y Senedd, a'r Aelodau sy'n eu cynrychioli.
Crëwyd y mapiau gan ddefnyddio dur o ffatri TATA Port Talbot yng ngweithdy'r cerflunydd ger Brynaman, yn unol â'i hymrwymiad i ddefnyddio deunyddiau a chrefftwaith Cymreig ar gyfer ei gwaith.
Mae dau o'r mapiau yn annog pobl i ddarganfod etholaethau'r Senedd a'r Aelodau sy'n eu cynrychioli. Mae'r trydydd map yn waith celf trawiadol sy'n dathlu tirwedd Cymru, wrth i fynyddoedd, bryniau a dyffrynnoedd ffurfio tonnau ar yr wyneb.
Mae 16 llyfryn 'Eich cynrychioli chi' yn cyd-fynd â'r mapiau. Wedi'u harddangos mewn daliwr cyhoeddiadau pwrpasol a wnaed gan yr artist, maent yn esbonio pa Aelodau sy'n cynrychioli gwahanol etholaethau Cymru. Gallwch hefyd ddod o hyd i'ch Aelodau drwy ddefnyddio nodwedd chwilio’r Senedd, Dod o hyd i Aelod o'r Senedd.
Sylwadau’r artist
“Yn dechnegol, roedd y map mwyaf yn heriol oherwydd yr haenau o ddur dalennog roedd eu hangen i greu’r mynyddoedd a’r dirwedd. Cafodd pob dalen ei thorri’n unigol, ac roedd angen bod yn ofalus wrth eu dewis a’u rhoi wrth ei gilydd cyn eu gosod yn eu trefn i adeiladu’r mynyddoedd a chreu’r dyffrynnoedd.”
Mae’r cerflun yn pwyso chwarter tunnell, ac yn mesur dau fetr o led ac ychydig dros ddau fetr o daldra. Mae wedi’i osod ar olwynion, er mwyn medru ei arddangos mewn gwahanol rannau o’r Senedd, a chaiff pobl eu hannog i gyffwrdd â’r dur, i deimlo’r cadwyni o fynyddoedd a dilyn llwybr y dyffrynnoedd a’r arfordir dramatig.
“Rwy’n teimlo fy mod i wedi dod i adnabod a gwerthfawrogi Cymru, pob modfedd ohoni, a’i gweld hi o’r newydd,” meddai Angharad. “Gobeithio y bydd pobl yn teimlo'r un fath ac yn gwerthfawrogi prydferthwch y tir, y mynyddoedd a siâp y wlad mewn ffordd nad ydi’n bosibl ar fap neu sat nav.”
