Cyfarfod i bob un o’r 60 Aelod o’r Senedd yw’r Cyfarfod Llawn, ac mae’n cael ei gynnal ar brynhawn dydd Mawrth a phrynhawn dydd Mercher.
Mae’r Cyfarfod Llawn yn dechrau am 13:30, a’r amseroedd gorffen yn amrywio, gan ddibynnu ar y busnes. Mae croeso i chi wylio’r Cyfarfod Llawn o Oriel Gyhoeddus Siambr Hywel.
Cewch weld beth fydd yn cael ei drafod yn y Cyfarfod Llawn trwy edrych ar Agenda’r Cyfarfod Llawn ar gyfer y cyfarfod o dan sylw.
Gan fod gwaith adeiladu’n mynd rhagddo yn Siambr y Senedd i baratoi ar gyfer y Seithfed Senedd, mae’r Cyfarfod Llawn yn cael ei gynnal dros dro yn Siambr Hywel, yn ein hadeilad yn Nhŷ Hywel, ym Mae Caerdydd. Mae croeso i chi wylio’r Cyfarfod Llawn o Oriel Gyhoeddus Siambr Hywel.
Mae'r Oriel Gyhoeddus yn gwbl hygyrch, gan gynnwys lle i gadeiriau olwyn. Darlledir y trafodion ar sgriniau o fewn yr ystafell, a darperir clustffonau i'r rheini sydd am gael cyfieithiad o'r Gymraeg i'r Saesneg.
Cadw seddi
Rydym yn argymell yn gryf bod pawb yn cadw seddi ymlaen llaw ar gyfer gwylio’r busnes, er mwyn osgoi siom. Mae croeso i ymwelwyr ofyn i unrhyw un sydd wrth ein derbynfeydd a oes unrhyw seddi ar gael ar y diwrnod.
Yn sgil y galw uchel am seddi, mae archebion grŵp yn gyfyngedig i 7 er mwyn gwneud y mwyaf o gyfleoedd mynediad. Rhaid casglu tocynnau ar gyfer dechrau’r Cyfarfod Llawn o dderbynfa Tŷ Hywel rhwng 13:00 a 13:30, er mwyn sicrhau bod pawb yn eistedd cyn i’r cyfarfod ddechrau.
I cadw eich seddi, llenwch y ffurflen cadw a ganlyn: Cadw seddi yn yr Oriel Gyhoeddus i wylio'r Cyfarfod Llawn
Rhaid casglu tocynnau ar gyfer dechrau’r Cyfarfod Llawn o dderbynfa Tŷ Hywel rhwng 13:00 a 13:30, er mwyn sicrhau bod pawb yn eistedd cyn i’r cyfarfod ddechrau.
Sylwer: Os na chaiff tocynnau eu casglu cyn dechrau'r cyfarfod, byddant yn cael eu hailddyrannu i'r rheini sydd ar y rhestr wrth gefn.
Os nad ydych chi, mwyach, yn gallu bod yno ar y diwrnod, rhowch wybod inni a gallwn ailddyrannu eich sedd(i) i'r rheini sydd ar y rhestr wrth gefn.
Rhestr wrth gefn
Os nad oes seddi ar gael pan eich bod chi am eu cadw, gellir rhoi eich enw ar y rhestr wrth gefn.
Os daw sedd ar gael cyn diwrnod y cyfarfod, byddwn yn cysylltu â chi i gadarnhau'r sedd sydd wedi'i chadw.
Os na fydd sedd ar gael cyn diwrnod y cyfarfod, mae croeso ichi ymweld â'r Senedd i wylio’r digwyddiadau ar y sgriniau yn ystod ein horiau agor. At hynny, gallwch hefyd ofyn yn unrhyw un o'n derbynfeydd a oes seddi ar gael ar y diwrnod.
At hynny, gallwch wylio busnes y Senedd yn fyw ar sgriniau yn y Senedd, neu wylio darllediadau byw ac archif o'r Cyfarfodydd Llawn a phwyllgorau ar Senedd.tv
Ystyriaethau cyn ymweld Eich ymddygiad yn ystod y Cyfarfod Llawn
- Caniatewch tua 15 munud ar gyfer mynd drwy’r broses ddiogelwch
- peidiwch â dod â llawer o eiddo gyda chi, gan fod gennym ni system ddiogelwch debyg i faes awyr ac mae’r holl ymwelwyr ac eiddo yn cael eu sganio
Eich ymddygiad yn ystod y Cyfarfod Llawn
Rhaid sicrhau bod pob dyfais electronig, fel ffonau symudol a gliniaduron, yn ddistaw.
Mae’n bosibl y cewch eich gwahardd o'r Oriel Gyhoeddus os byddwch chi'n ymddwyn mewn modd afreolus neu aflonyddgar, neu os byddwch chi'n tarfu ar fusnes y Senedd.
Pan ddewch i’r Cyfarfod Llawn, rhaid i chi beidio â:
- bod dan ddylanwad alcohol na chyffuriau;
- peri tramgwydd i ymwelwyr eraill;
- siarad yn uchel na tharfu ar y cyfarfod mewn unrhyw ffordd;
- dod â bwyd a diodydd i'r oriel;
- defnyddio e-sigaréts yn ystod y cyfarfod;
- tynnu lluniau yn ystod y cyfarfod.
Os hoffech gael rhagor o wybodaeth, neu os oes gennych gwestiwn, mae croeso i chi gysylltu â ni.
