Ein Buddion

Pan fyddwch yn dechrau eich swydd newydd, byddwch yn gymwys i ymuno â chynllun pensiwn y Gwasanaeth Sifil. Byddwch yn cael y manylion llawn am eich opsiynau pensiwn pan gewch eich penodi, ond os hoffech wybod mwy yn y cyfamser, ewch i wefan Cynllun Pensiwn y Gwasanaeth Sifil <https://www.civilservicepensionscheme.org.uk/>.

Rydym yn gyflogwr sy'n hapus i siarad am weithio'n hyblyg ac, yn dibynnu ar anghenion eich rôl, gallwn ystyried patrymau gweithio hyblyg gan gynnwys gweithio’n rhan-amser, rhannu swydd, gweithio yn ystod y tymor ac oriau cywasgedig. Mae gan rai pobl drefniadau gweithio hyblyg ffurfiol sy’n eu galluogi i weithio o bell, naill ai’n barhaol neu’n rheolaidd. Fodd bynnag, os yw'ch rôl yn caniatáu ar gyfer hynny, cewch gyfle i weithio gartref yn awr ac yn y man hefyd.

Gallwn hefyd gynnig oriau gwaith hyblyg i'ch helpu i reoli'ch diwrnod gwaith mewn ffordd sy'n addas i ni ac i chi. Wrth gwrs, mae’r hyblygrwydd yn amrywio gan ddibynnu ar eich rôl ac anghenion eich gwaith, ond mewn llawer o achosion bydd gennych hyblygrwydd i drefnu'ch diwrnod gwaith, i’ch helpu i gydbwyso eich bywyd gwaith a’ch bywyd cartref.

Fel aelod staff parhaol ac amser llawn bydd gennych 31 diwrnod o wyliau â thâl y flwyddyn ac 11 diwrnod o wyliau cyhoeddus a gwyliau braint bob blwyddyn (os nad ydych yn gweithio oriau safonol byddwch yn cael hawl pro rata sy'n gymesur â'ch patrwm gwaith). Rydym hefyd yn caniatáu i chi werthu hyd at bedwar diwrnod o wyliau â thâl yn ôl bob blwyddyn.

Rydym yn cynnig amrywiaeth o opsiynau absenoldeb teulu hael i'ch cefnogi i reoli’ch bywyd teuluol, p'un a yw hynny'n absenoldeb mamolaeth, cyd-rianta (tadolaeth), mabwysiadu neu'n absenoldeb rhiant a rennir. Mae gennym hefyd bolisi seibiant gyrfa sy'n eich galluogi i gymryd hyd at bum mlynedd i ffwrdd o'r gwaith ar absenoldeb di-dâl os byddwch yn penderfynu cymryd seibiant o'r gwaith i astudio neu deithio, i wneud gwaith gwirfoddol, neu i ganolbwyntio ar gyfrifoldebau gofalu.

Fel cyflogwr achrededig Platinwm Buddsoddwyr mewn Pobl, rydym yn ymrwymo i'ch cefnogi gyda'ch dysgu a'ch datblygiad parhaus, gan ddechrau gyda rhaglen gynefino wedi'i theilwra i'ch helpu i ymgartrefu yn eich rôl newydd. Byddwch yn cael cyfarfodydd adolygu perfformiad rheolaidd i nodi a thrafod eich anghenion dysgu a datblygu ac yn cael mynediad parhaus i'n cronfa ddysgu sy’n cynnwys ystod o gyrsiau a rhaglenni hyfforddi mewnol. Fel sefydliad dwyieithog rydym hefyd yn cynnal hyfforddiant mewnol rheolaidd ar gyfer pobl sy’n dysgu Cymraeg ar bob lefel.

Rydym hefyd yn cynnig hyfforddiant, mentora, cysgodi swydd a chyfleoedd secondiad, cymorth ariannol ac absenoldeb i chi gael hyfforddiant allanol yn ogystal â chymwysterau addysg bellach ac uwch. Byddwch hefyd yn gallu defnyddio ein llyfrgell sydd ag ystod eang o adnoddau papur a digidol.

Ein hamcan yw mynd ati’n barhaus i ddatblygu diwylliant gwaith sy'n diogelu, yn hyrwyddo ac yn cefnogi iechyd a lles ein holl bobl. Dyna pam rydym yn cynnig absenoldeb salwch â thâl am gyfnodau o salwch meddyliol a chorfforol, ynghyd â darparu mynediad at y Rhaglen Cymorth i Weithwyr a Chynghorydd Iechyd Galwedigaethol sy'n eich galluogi i gael mynediad at amrywiaeth o wasanaethau i'ch helpu i ofalu am eich iechyd a'ch llesiant.

Ochr yn ochr â'r strwythurau cymorth mwy ffurfiol hyn, mae gennym hefyd lawer o weithgareddau anffurfiol i gefnogi'ch iechyd a'ch lles, fel sesiynau ymwybyddiaeth ofalgar neu ioga rheolaidd, aelodaeth â champfa am bris gostyngedig neu grŵp cerdded neu redeg amser cinio gyda’ch tîm.

Rydym yn cydnabod y gall fod adegau yn ystod eich cyflogaeth pan efallai yr hoffech ofyn am gymorth a chyngor. Ynghyd â'ch rheolwr llinell ac aelodau o'r tîm Adnoddau Dynol, ein Cynllun Cymorth i Weithwyr cyfrinachol, y Cynghorydd Iechyd Galwedigaethol a’r rhwydweithiau staff, <link to our values page> byddwch hefyd yn cael cyfle i ymaelodi ag un o'n hundebau llafur cydnabyddedig – y Gwasanaethau Cyhoeddus a Masnachol (PCS), IPMS/Prospect a’r First Division Association (FDA).

Mae'r tair undeb yn gweithio gyda'i gilydd i drafod telerau ac amodau fel ein system gyflog a’n trefniadau iechyd a diogelwch. Mae swyddogion undeb amser llawn yn gweithio ar y safle a all roi cyngor cyfrinachol ar yr holl faterion sy’n ymwneud â gwaith, ac a all eich cynrychioli os oes gennych broblemau yn y gwaith.

Mae gennym sawl cynllun i'ch cefnogi i deithio i'r gwaith, gan gynnwys cynllun beicio i'r gwaith (sy'n eich galluogi i arbed arian wrth brynu beic ac ategolion), mynediad i gyfleusterau parcio ceir (am gost isel yn seiliedig ar eich band tâl) a benthyciadau tocynnau tymor di-log os ydych yn defnyddio trafnidiaeth gyhoeddus. Gallwch hefyd gael mynediad at raciau beiciau diogel ac mae cawodydd ar y safle.

Mae ein ffreutur yn darparu opsiynau prydau bwyd bob dydd ar gyfer yr holl ofynion dietegol, mae gennym siop fach lle gallwch brynu byrbryd neu goffi ac mae gennym swyddfa bost ar y safle hyd yn oed. Hefyd, mae yna geginau lle gallwch baratoi eich bwyd eich hun yn ogystal â chawodydd lle gallwch ymolchi ar ôl beicio i'r gwaith neu ar ôl gwneud ymarfer corff amser cinio.

Mae mwyafrif ein staff wedi'u lleoli ym Mae Caerdydd, sef ardal fywiog ar lan y dŵr sydd â llawer o gyfleusterau gan gynnwys Canolfan y Mileniwm, bwytai, caffis, sinemâu, campfeydd a siopau. Mae Bae Caerdydd yn hawdd ei gyrraedd mewn car neu ar drafnidiaeth gyhoeddus ac mae hefyd wedi'i gysylltu'n dda â llwybrau beicio a cherdded.