Mae'r cynig canlynol ar gyfer Bil Aelod wedi bod yn llwyddiannus yn sgil pleidlais ar 22 Medi 2021.
Ymweld Datblygu'r Bil Bwyd (Cymru)
Mae'r canlynol yn gynnig ar gyfer Bil Aelod a gyflwynwyd yn ystod y Chweched Senedd:
Aelod sy'n Cynnig:
Teitl y Bil Arfaethedig:
Bil Bwyd (Cymru)
Amcanion Polisi y Bil:
Diben y Bil yw sefydlu system fwyd mwy cynaliadwy yng Nghymru i wella diogelwch bwyd, gwella lles economaidd-gymdeithasol Cymru a chynnig mwy o ddewis i ddefnyddwyr.
Byddai'r Bil hefyd yn anelu at:
- Rhoi dyletswydd ar Weinidogion Cymru i lunio strategaeth fwyd flynyddol i Gymru er mwyn mynd i'r afael â thlodi bwyd a diffyg maeth, a hynny er mwyn sicrhau twf cynaliadwy yn y sector bwyd i greu swyddi a denu buddsoddiad, a sicrhau bod cynhyrchwyr bwyd lleol cynaliadwy yn gallu cael gafael ar gymorth a chymhellion digonol;
- Sefydlu Comisiwn Bwyd Cymru i gyd-gynhyrchu a chyflawni strategaeth system fwyd gwytnach a mwy integredig mewn cydweithrediad â rhanddeiliaid;
- Darparu system fwyd mwy cynaliadwy a lleol, sy'n ei gwneud yn ofynnol i awdurdodau lleol a gwasanaethau cyhoeddus eraill ddatblygu cynlluniau bwyd cymunedol i atgyfnerthu prosesau caffael cyhoeddus a chreu gwell seilwaith i gysylltu cynhyrchwyr a defnyddwyr bwyd;
- Ei gwneud yn ofynnol i Weinidogion Cymru adrodd yn flynyddol ar lefelau cynhyrchu bwyd yng Nghymru, a datblygu cyfres o ddangosyddion i ddangos cyfraniad y sector bwyd at sicrhau diogelwch bwyd;
- Anelu at ddileu pob math o wastraff bwyd a mandadu archfarchnadoedd a siopau perthnasol eraill i roi bwyd diangen i elusennau a banciau bwyd er mwyn helpu’r bobl sydd fwyaf agored i niwed yn y gymdeithas;
- Cryfhau’r gofynion statudol ar gyfer labeli bwyd, megis nodi’r wlad tarddiad ar gyfer bwyd a fwyteir gartref a bwyd a fwyteir mewn lleoliadau gwasanaeth bwyd/lletygarwch, yn ogystal â chynaliadwyedd bwyd a gynhyrchir yng Nghymru.