Hyrwyddwyr Cymunedol Gorllewin De Cymru

Yn ogystal â’r banc bwyd mae Liz a’i thîm yn Ymddiriedolaeth Bethel Port Talbot yn darparu prydau bwyd, dillad, yn helpu i ddod o hyd i swyddi a llety, mynediad at TG a chefnogaeth o ran adferiad o ddibyniaeth, ac maent yn helpu rhwng 50 a 70 o unigolion bob wythnos.

Mae Lem yn weinidog ar Eglwys Compassion Pen-y-bont ar Ogwr ac mae ei eglwys yn cymryd rhan yn rheolaidd mewn prosiectau cymunedol, gan gynnwys cefnogi menywod a merched sydd wedi cael problemau cam-drin cyffuriau.

Yn ystod y cyfnod clo, rhoddodd gefnogaeth fugeiliol i lawer a dosbarthodd becynnau i athrawon i ddangos diolchgarwch y gymuned am eu gwaith caled.

Mae Linda wedi bod yn arwr yn ei chymuned ers nifer o flynyddoedd. Yn ystod y pandemig, mae ei gwaith dros y gymuned ym Mayals wedi dwysáu mwy fyth. Mae hi wedi gweithio’n galed i sicrhau bod cymorth ar gael i’w chymuned drwy lansio caffis cymunedol a chefnogi banciau bwyd, yn ogystal â dod o hyd i grantiau i adeiladu cyfleusterau hamdden sydd mawr eu hangen.

“Nid yw masgiau na chadw pellter cymdeithasol wedi lladd ysbryd y tîm; maen nhw'n gwneud y job!”

Dyma rai o dîm Banc Bwyd Eastside wrth eu gwaith, fel maen nhw wedi bod ers 2014 a thrwy gydol y pandemig.

Cafodd y banc bwyd yn Llwyn Fedw ei sefydlu ychydig cyn y cyfnod clo cychwynnol ac mae wedi ymroi i gefnogi pobl ers hynny.

Mae Juliet a’i thîm wedi cefnogi dros 1,500 o oedolion a phlant drwy ddarparu bwyd a nwyddau hanfodol mewn amseroedd caled.

Yn ystod y pandemig, mae’r banc bwyd wedi cefnogi’r gymuned drwy ddarparu dros 10,000 o fagiau o brydau ysgol am ddim a’u cludo i stepen ddrws y plant; drwy gynnal banc bwyd pum diwrnod yr wythnos a dosbarthu tunelli o fwyd gwastraff o archfarchnadoedd ledled y ddinas i bobl y mae angen bwyd arnynt; drwy gefnogi mamau newydd bregus drwy raglen i ddarparu nwyddau sylfaenol i fabanod; a thrwy gasglu presgripsiynau a nwyddau hanfodol dros bobl sydd methu gadael eu cartrefi.

Leanne yw rheolwr Hill Community Development Trust, Canolfan y Ffenics, Townhill, er dechreuodd ei Gwaith yn y ganolfan fel gwirfoddolwr. Diolch i ymdrechion Leanne i wella bywydau pobl mae’r ganolfan yn galon i’r gymuned.

Mae Thom a gwirfoddolwyr o Mathews House Swansea yn paratoi, coginio a gweini prydau bwyd i bobl ddigartref a bregus gan ddefnyddio stoc dros ben gan archfarchnadoedd. Maent hefyd yn darparu pecynnau urddas, cawodydd a gwasanaethau golchi dillad. 

Fel ‘cydlynydd ardal leol’ yn Townhill, Abertawe mae Bethan wedi gweithio’n galed i sefydlu ei hun yn y gymuned. Mae hi wedi estyn llaw i bobl sy’n ynysig ac mae wedi’u cysylltu â grwpiau cymunedol, ac wedi dosbarthu parseli a meddyginiaethau. Mae Bethan wedi mynd y tu hwnt i’w rôl i ddiwallu anghenion pobl Townhill.

“…person doeth, gofalgar a chefnogol” 

Dyma Hannah Sabatia a’i thîm o wirfoddolwyr a rhai o’r ffoaduriaid ac aelodau o’r gymuned ceiswyr lloches y mae’n gweithio gyda nhw fel Swyddog Datblygu prosiect Croeso Cynhesach i Abertawe.

Rachel yw sylfaenydd a rheolwr prosiect yr elusen ffoaduriaid, Swansea Bloom yn Abertawe, lle mae’n cefnogi teuluoedd i ymgartrefu ac integreiddio yng Nghymru, ac mae’n rhoi popeth i helpu pobl sydd wedi dioddef llwybr trawmatig hyd yma.