Atebion a roddwyd i Aelodau ar 10 Mehefin 2009

[R] yn nodi bod yr Aelod wedi datgan buddiant.
[W] yn nodi bod y cwestiwn wedi’i gyflwyno yn Gymraeg.

Cynnwys

Cwestiynau i’r Dirprwy Brif Weinidog a’r Gweinidog dros yr Economi a Thrafnidiaeth

Cwestiynau i’r Gweinidog dros yr Amgylchedd, Cynaliadwyedd a Thai

Cwestiynau i’r Gweinidog dros Dreftadaeth

Cwestiynau i’r Dirprwy Brif Weinidog a’r Gweinidog dros yr Economi a Thrafnidiaeth

Mark Isherwood (Gogledd Cymru): Yn dilyn trafodaeth eich adran ag Air Products, Acrefair, Wrecsam, pa gymorth ariannol a fyddai modd ei ddarparu gan neu drwy Lywodraeth Cynulliad Cymru i gefnogi gwrthgynigion i gadw’r safle hwn ar agor? (WAQ54290)

Y Dirprwy Brif Weinidog a’r Gweinidog dros yr Economi a Thrafnidiaeth (Ieuan Wyn Jones): Mae’n rhaid i’r cymorth a ddarparwyd i ymgymeriadau sy’n ymwneud â gweithgaredd economaidd gael ei gyflwyno yn unol â rheolau cymorth Gwladwriaethol y Comisiwn Ewropeaidd. Ar hyn o bryd mae fy swyddogion yn archwilio pob opsiwn ariannu cyfreithiol sydd o fewn pwerau Llywodraeth Cynulliad Cymru i ddarparu cymorth i Air Products, gan ystyried cwmpas llawn y rheolau cymorth Gwladwriaethol a sicrhau y darperir unrhyw gymorth yn seiliedig ar achos busnes cadarn.

Kirsty Williams (Brycheiniog a Sir Faesyfed): Faint o gyllid y mae Network Rail wedi’i ddyrannu ar gyfer Rheilffordd y Cambrian? (WAQ54299)

Y Dirprwy Weinidog: Mae Network Rail yn buddsoddi £5 miliwn o’i Chronfa Berfformio i wella seilwaith Rheilffordd y Cambria rhwng Aberystwyth a’r Amwythig, fel rhan o fuddsoddiad ar y cyd gyda Llywodraeth Cynulliad Cymru.

Kirsty Williams (Brycheiniog a Sir Faesyfed): Faint o gyllid y mae Network Rail wedi’i wario ar Reilffordd y Cambrian? (WAQ54300)

Y Dirprwy Weinidog: Mae Network Rail wedi gwario £3.8 miliwn o’i Chronfa Berfformio i wella seilwaith Rheilffordd y Cambria rhwng Aberystwyth a’r Amwythig.

Mae Network Rail hefyd yn ariannu’r system signalau ERTMS sy’n cael ei threialu ar Linell y Cambria, ac hefyd yn darparu arian ar gyfer gwaith adnewyddu a gwaith cynnal a chadw arall. Mater i Network Rail yw hwn ac rwyf wedi gofyn iddynt gysylltu â chi i esbonio hyn yn fanylach.

Kirsty Williams (Brycheiniog a Sir Faesyfed): Faint o gyllid y mae Llywodraeth Cynulliad Cymru wedi’i ddyrannu ar gyfer Rheilffordd y Cambrian? (WAQ54301)

Y Dirprwy Weinidog: Rwy’n darparu £8 miliwn o arian cyfalaf i wella seilwaith Rheilffordd y Cambria rhwng Aberystwyth a’r Amwythig, fel rhan o fuddsoddiad ar y cyd gyda Network Rail.

Rwyf hefyd yn darparu tua £1.7 miliwn yn flynyddol ar gyfer trenau pedwar cerbyd ar Brif Linell y Cambria.

Kirsty Williams (Brycheiniog a Sir Faesyfed): Faint mae Llywodraeth Cynulliad Cymru wedi’i wario ar Reilffordd y Cambrian? (WAQ54302)

Y Dirprwy Weinidog: Hyd yma, mae £5 miliwn (o’r £8 miliwn) wedi’i wario ar wella seilwaith Rheilffyrdd y Cambria rhwng Aberystwyth a’r Amwythig.

Ers mis Rhagfyr 2006, mae tua £1.7 miliwn (ar brisiau cyfredol) wedi’i wario bob blwyddyn i atgyfnerthu’r gwasanaethau trenau pedwar cerbyd ar Brif Linell y Cambria.

Kirsty Williams (Brycheiniog a Sir Faesyfed): A wnaiff y Gweinidog ddatganiad ynghylch p’un ai a oes cynnydd wedi’i wneud gyda chyd-Weinidogion y DU a gyda Gweithrediaeth yr Alban ynghylch cydgordio’r cynlluniau consesiynau bws yng Nghymru, Lloegr a’r Alban ledled y Deyrnas Unedig? (WAQ54307)

Y Dirprwy Weinidog: Mae trafodaethau rhwng fy swyddogion a swyddogion Llywodraeth y DU a Llywodraeth yr Alban yn mynd rhagddynt.

Kirsty Williams (Brycheiniog a Sir Faesyfed): Pryd y bydd y broses ail-dendro yn dechrau ar gyfer darpariaeth FSB4 yng Nghanolbarth Cymru? (WAQ54308)

Y Dirprwy Weinidog: Disgwylir i’r broses dendro ddechrau ddydd Llun 8fed Mehefin 2009, a dylid penodi contractwr newydd yn gynnar ym mis Awst fan bellaf.

Mark Isherwood (Gogledd Cymru): Yn dilyn eich sylwadau i Ann Jones yn y Siambr ar 3 Mehefin 2009 yn ymwneud â’r Fenter Tocynnau Teithio Rhatach ar Drafnidiaeth Gymunedol, beth yw eich cynlluniau ar gyfer cyllido hyn yn awr ac yn y blynyddoedd ariannol dilynol? (WAQ54311)

Y Dirprwy Weinidog: Ni fydd y trefniadau cyllido ar gyfer y Fenter Tocynnau Teithio Rhatach ar Drafnidiaeth Gymunedol (CTCFI) yn newid ar gyfer 2009-10.

Felly, bydd y 15 o weithredwyr trafnidiaeth gymunedol sydd o fewn cwmpas y CTCFI yn gallu cynnig yr un lefel o wasanaeth â’r hyn a welwyd yn ystod y tair blynedd ddiwethaf.

Ar gyfer 2010/11 a 2011/12, rwyf wedi gofyn i’m swyddogion weithio’n agos gyda Chymdeithas Trafnidiaeth Gymunedol Cymru i edrych ar ddichonoldeb model cyllido sy’n gynaliadwy ac yn cwmpasu’r sector trafnidiaeth gyhoeddus gyfan.

Cwestiynau i’r Gweinidog dros yr Amgylchedd, Cynaliadwyedd a Thai

Mark Isherwood (Gogledd Cymru): Yn ychwanegol at yr estyniad a roddwyd i Gyngor Sir y Fflint o ran y Safon Ansawdd Tai Cymru (a) beth yw’r sefyllfa bresennol, (b) beth sydd wedi cael ei gytuno neu sydd wrthi’n cael ei gytuno, ac (c) beth yw’r amserlenni dan sylw? (WAQ54317)

Y Gweinidog dros yr Amgylchedd, Cynaliadwyedd a Thai (Jane Davidson): Ar yr 17eg Chwefror 2009, pleidleisiodd Cyngor Sir y Fflint yn unfrydol i drefnu pleidlais i’w denantiaid o ran trosglwyddo’r stoc tai i landlord cymdeithasol cofrestredig. Noda’r awdurdod fod y bleidlais yn debygol o gael ei chynnal ddiwedd flwyddyn nesaf (2010). Yn y cyfamser bydd fy swyddogion yn gweithio’n agos gyda phrif weithredwr yr awdurdod yn ystod y cyfnod hwn cyn y bleidlais, a chaiff y cyfarfod nesaf ei gynnal ar 15ed Gorffennaf 2009.

Cwestiynau i’r Gweinidog dros Dreftadaeth

Alun Cairns (Gorllewin De Cymru): A wnaiff y Gweinidog (a) restru’r amgueddfeydd a’r orielau a gefnogwyd yng Nghymru, yn ogystal â’r cymorth ariannol a ddyfarnwyd i bob un ohonynt, a (b) nifer yr ymwelwyr a ddenwyd i bob un dros y 12 mis diwethaf? (WAQ54303)

Y Gweinidog dros Dreftadaeth (Alun Ffred Jones): Dosbarthwyd tua £500,000 mewn grantiau i 50 o amgueddfeydd lleol gan Adran Dreftadaeth Llywodraeth Cynulliad Cymru yn 2008-09, a hyd yn hyn mae tua £540,000 o grantiau wedi’u dyrannu i 28 o amgueddfeydd lleol yn 2009-10. Darperir manylion llawn yn Atodiad 1. Mae’r grantiau’n amodol ar brosesau gwneud cais, a chânt eu dosbarthu gan fy swyddogion yn CyMAL: is-adran Amgueddfeydd, Archifau a Llyfrgelloedd Cymru a Cadw.

Darparwyd £24.5 miliwn o gymorth grant i Amgueddfa Cymru—National Museum Wales gan Lywodraeth Cynulliad Cymru yn 2008-09, a bydd yn darparu £25.1 miliwn yn 2009-10. Yn ogystal, bydd yn darparu £1 miliwn ar draws 2008-10 i ddatblygu Adain Uchaf y Gorllewin yn Amgueddfa Genedlaethol Caerdydd, a £250k i’w fuddsoddi mewn mesurau arbed ynni. Roedd cyfanswm nifer yr ymwelwyr ar gyfer saith safle Amgueddfa Cymru - National Museum Wales dros 1.5 miliwn yn 2008.

Mae Cyngor Celfyddydau Cymru, fel Corff a Noddir gan Lywodraeth y Cynulliad, yn derbyn cymorth grant gan Lywodraeth Cynulliad Cymru ac mae wedi buddsoddi tua £1,035,000 mewn grantiau i orielau yn 2008-09. Ceir manylion llawn yn Atodiad 2. Dylid nodi nad yw hyn yn cynnwys tua £2,642,000 o grantiau a ddarparwyd i ganolfannau celfyddydau amlswyddogaeth ag orielau yn 2008-09, am na ellir gwahanu arian sy’n benodol ar gyfer orielau.

Lle bo’r ffigurau ar gael, mae nifer yr ymwelwyr ar gyfer y flwyddyn ddiwethaf wedi’i ychwanegu at y rhestrau gan ddefnyddio canlyniadau arolwg diweddaraf Ymweliadau ag Atyniadau Twristaidd 2008, a gafodd ei baratoi ar gyfer Croeso Cymru gan Beaufort Research.

Atodiad 1

CyMAL: Is-adran Amgueddfeydd, Archifau a Llyfrgelloedd Cymru

Is-adran Cadw - grantiau gan Cadw ar gyfer atgyweirio/adfer adeiladau hanesyddol

*Mae’r ffigurau ymwelwyr yn seiliedig ar holiaduron a ddychwelwyd gan amgueddfeydd ac orielau fel rhan o’r gwaith ymchwil a gyflawnwyd gan Beaufort Research ar ran Croeso Cymru.

Atodiad 2

Arian i orielau gan Gyngor Celfyddydau Cymru

*Mae’r ffigurau ymwelwyr yn seiliedig ar holiaduron a ddychwelwyd gan amgueddfeydd ac orielau fel rhan o’r gwaith ymchwil a gyflawnwyd gan Beaufort Research ar ran Croeso Cymru.

Alun Cairns (Gorllewin De Cymru): Faint o bobl sydd wedi ymweld â’r Ardd Fotaneg Genedlaethol ym mhob un o’r 5 mlynedd diwethaf? (WAQ54304)

Alun Ffred Jones: Yn ôl Gardd Fotaneg Genedlaethol Cymru, mae nifer yr ymwelwyr fel a ganlyn:

Cyn y llynedd, nid oes data ar gael sy’n dangos y tueddiadau hanesyddol rhwng mynediad wedi’i dalu a mynediad am ddim.

Nick Bourne (Canolbarth a Gorllewin Cymru): A wnaiff y Gweinidog ddarparu rhestr o’r symiau a wariwyd ar sefydliadau neu brosiectau diwylliannol er 2000 gan ddynodi ym mhob achos ym mha awdurdod lleol neu awdurdodau lleol y mae pob sefydliad neu brosiect wedi’i leoli? (WAQ54312)

Alun Ffred Jones: Nid yw’n bosibl darparu rhestr o wariant ar brosiectau neu sefydliadau diwylliannol ers 2000 fesul awdurdod lleol o’m portffolio, am nad yw’r gwariant a nodir yn fy adran yn cael ei gasglu ar y sail hwnnw. Gwneir y rhan fwyaf o’r arian y mae fy adran yn ei wario ar ddiwylliant drwy Gyrff a Noddir gan Lywodraeth y Cynulliad.