Bydd y Fonesig Rosemary Butler AC, Llywydd Cynulliad Cenedlaethol Cymru, yn rhoi araith yn Sioe Frenhinol Cymru ar 22 Gorffennaf.
Bydd y Fonesig Rosemary yn cynnal derbyniad ym Mhafiliwn y Llywodraethwyr am 16.30, lle y bydd yn rhoi araith i nodi ei blaenoriaethau ar gyfer gweddill y pedwerydd Cynulliad.
Dyma'r blaenoriaethau hynny:
- Sicrhau eglurder a chysondeb o ran y pwerau pellach a gaiff eu datganoli a gwneud yn siŵr bod ein negeseuon allweddol yn berthnasol a bod pobl yn eu deall;
- Sicrhau bod llais Cymru yn parhau i gael ei glywed ar lefel y DU;
- Ymgysylltu mwy â phobl Cymru a gwneud yn siŵr ein bod yn manteisio ar arbenigedd a gwybodaeth eang ein holl gymunedau amrywiol, a;
- Sicrhau bod ein trafodion yn agored ac yn dryloyw a bod mwy o gyfleoedd ar gyfer gwaith craffu effeithiol.
Yn ei haraith, bydd yn dweud, "Dyma oedd fy mlaenoriaethau hyd yma fel Llywydd y Cynulliad, a dyma fydd fy mlaenoriaethau wrth i ni symud at ddiwedd y pedwerydd Cynulliad".
Ond bydd y Fonesig Rosemary yn canolbwyntio ar rai o gyflawniadau'r pedair blynedd ddiwethaf hefyd, yn enwedig y daith gyfansoddiadol.
Bydd yn dweud, "Cyn refferendwm yr Alban ac ers hynny, rwyf wedi treulio llawer o'm hamser yn sicrhau bod llais Cymru yn cael ei glywed ar lefel y DU."
"Nid ydym eisiau, ac nid ydym yn haeddu, cael ein hanghofio yn y drafodaeth am ddatganoli pwerau pellach i Gymru tra bod cryn siarad am ddatganoli i'r Alban a rhanbarthau Lloegr.
"Felly, rwyf wedi gwneud sylwadau pendant, er mwyn sicrhau bod gan y Cynulliad le cadarn a pharhaol a bod gennym y cyfrifoldeb i benderfynu ynghylch ein materion ein hunain yn y dyfodol. Roeddwn yn falch o gydweithio'n agos ag Ysgrifennydd Gwladol Cymru i ddiogelu ein lle yn y DU ac rwy'n croesawu ei ymrwymiad i gyflwyno Bil Cymru a fydd yn gweithredu'r ymrwymiad a wnaeth yn ei gyhoeddiad Ddydd Gŵyl Dewi yn gynharach eleni yn llawn.
"Ond wrth gwrs, bydd angen sicrhau bod manylion y Bil yn gywir, felly rwy'n parhau i bwyso ar y bobl briodol i sicrhau ein bod ni'n cael setliad sy'n adlewyrchu ein haeddfedrwydd fel sefydliad seneddol yn deg, ac sy'n sicrhau eglurder a chysondeb - nid yn unig i'r Cynulliad ond i bobl Cymru."
Bydd y Llywydd yn galw unwaith eto am i'r Cynulliad allu penderfynu ynghylch:
- ei drefniadau etholiadol ei hun;
- ei enw (sy'n fater symbolaidd, pwysig); ac
- yr oedran pleidleisio priodol ar gyfer etholiadau'r Cynulliad.
Fel rhan o'r araith, bydd y Fonesig Rosemary hefyd yn ystyried yr hyn a gyflawnwyd dros y pedair blynedd ddiwethaf i sicrhau bod gwaith Aelodau'r meinciau cefn wrth graffu ar Weinidogion yn fwy perthnasol ac amrywiol, yn ogystal â chyflwyno amser penodedig ar gyfer 'Cwestiynau gan Arweinwyr y Pleidiau' yn ystod Cwestiynau'r Prif Weinidog.